ट्रम्प पुत्री आउनुअघि भारतलाई बनाइदै ‘भिखारीमुक्त’ शहर

२९ कार्तिक २०७४

banner

बीबीसी । भारतको हैदराबाद शहरलाई भिखारीमुक्त बनाउन प्रयासरत प्रहरी र स्थानीय प्रशासनले त्यहाँका नागरिकसँग सहकार्य गर्दैछन्।

आउँदो डिसेम्बर १ तारिखपछि शहरमा देखिने कुनै पनि भिखारीबारे जानकारी दिने व्यक्तिले ५०० भारु इनाम पाउनेछन्। आनन्द आश्रमका अध्यक्ष एम सम्पतले बीबीसीलाई भने, हामी डिसेम्बर १ तारिखका दिन हैदराबादलाई भिखारीमुक्त घोषणा गर्दछौँ। जेल विभागले त्यसमा सघाउनका निम्ति ५०० रुपैयाँ इनाम दिने घोषणा गरेको हो।

उनले त्यसको उद्देश्य तेलंगानामा भीख माग्ने कार्यमा नियन्त्रण गर्नेसम्बन्धी नियम लागू गराउने अभियानमा नागरिकहरुको सहभागिता बढाउने रहेको बताए।

चञ्चलगुडा जेलमा आनन्द आश्रम निर्माण गरिएको छ जहाँ भिखारीहरुलाई पुनर्वासका लागि पठाइँदैछ। प्रहरी कमिश्नर एम महेन्द्र रेड्डीले दुई महिनाका लागि भीख माग्नमा प्रतिबन्ध लगाइएको घोषणा गरेपछि भिखारीहरुविरुद्ध पछिल्लो हप्तादेखि कारबाही थालिएको हो।
नोभेम्बर ८ तारिखदेखि लागू गरिएको प्रतिबन्ध आउँदो ज्यानुअरी ७ तारिखसम्म जारी रहनेछ।

आलोचकहरुले अमेरिकी राष्ट्रपति डोनल्ड ट्रम्पकी छोरी इभान्काको यात्रालाई मध्यनजर गर्दै उक्त कदम चालिएको बताएका छन्।
नोभेम्बर २८ देखि २९ तारिखसम्म चल्ने अन्तर्राष्ट्रिय उद्यमी सम्मेलनमा सहभागी हुन इभान्का त्यहाँ जाने कार्यक्रम छ।

यद्यपि स्थानीय प्रशासनले त्यो कारणले पछिल्लो अभियान थालिएको भन्ने दाबी अस्वीकार गरेको छ। यसअघि सन् २००० को मार्चमा अमेरिकाका पूर्व राष्ट्रपति बिल क्लिन्टन आउनुअघि भिखारीहरुलाई सडकबाट हटाइएको थियो। भिखारीहरुलाई नियन्त्रणमा लिन पूजास्थल, रेल्वे स्टेशन, बस स्टेशन लगायतका स्थानमा कारबाही भइरहेको छ।

अधिकारीहरुका अनुसार हालसम्म ३६६ जना भिखारीलाई नियन्त्रणमा लिएर आनन्द आश्रम पठाइएकोमा १२८ जनाले त्यही बस्ने निर्णय गरेका छन् भने भीख नमाग्ने प्रतिवद्धता जनाउँदै बाँकी २३८ जना घर फर्केका छन्।

भिखारीहरुलाई तालिम दिएर पेट्रोल पम्पमा काममा लगाउने जेल विभागको योजना रहेको छ।

Leave a reply

HTML Tags are not supported

Post My Comment »