एजेन्सी। पहिलो दिनमै बलिउड फिल्मको इतिहासमै सबैभन्दा धेरै कमाउने फिल्म ‘ठग्स अफ हिन्दोस्तान’ तेस्रो दिनमै पछारिएको छ । फिल्मको कमाइको अनुपात ह्वात्तै घटेको छ । पहिलो दिन कमाइले आकाश छोएको फिल्म तेस्रो दिनमै भुइँमा पछारिएको छ । फिल्ममा आमिर खान, अमिताभ बच्चन, कट्रिना कैफ, फतिमा सना शेख जस्ता ठूला स्टार छन् ।

पहिलो दिन ५२.२५ करोडको कमाइ गरेको फिल्मको कमाइ दोस्रो दिनमै आधा भएको थियो । दोस्रो दिन फिल्मले मात्रै २९.२५ करोड कमाएको थियो । तेस्रो दिन फिल्मको कमाइ झनै तल झरेर २२.७५ करोडमा झरेको छ । यद्यपि फिल्मले तीन दिनमा १०० करोड कमाइ भने गरेको छ । पहिलो दिनको कमाइ हेर्दा फिल्मले ४ दिनमै २०० करोड कमाउने देखिएको थियो तर पहिलो दिन फिल्म हेरेपछि दर्शकले दिएको नकारात्मक प्रतिक्रियाका कारण फिल्मका दर्शक दोस्रो दिनदेखि नै घट्न थालेका छन् ।

४ दिन लामो विकेन्डका कारण फिल्मले चौथो दिनसम्ममा १३० करोड कमाउने अपेक्षा गरिएको छ । तर, त्यसपछि सोमबारदेखि विदा सकिने भएकोले फिल्मको कमाइ ह्वात्तै घट्नेछ । फिल्म करिब ३०० करोडको लगानीमा बनेको बताइएको छ । फिल्मप्रति दर्शकको प्रतिक्रिया र घट्दो कमाइको अनुपात हेर्दा फिल्मले लगानी उठाउन पनि मुस्किल देखिएको छ ।