एजेन्सी। ब्लकबस्टर फिल्म बाहुबलीबाट ठूलो चर्चा पाएका सुपरस्टार प्रभास अहिले नयाँ फिल्म साहोमा व्यस्त छन् । प्रभास कहिलेकाहीँ कुनै इभेन्टमा देखिन्छन् तर पछिल्लो समय उनी मिडियाबाट टाढै बसेका छन् । हालै प्रभासका केही फोटोहरु सामाजिक संजालमा भाइरल भइरहेका छन् । यी तस्वीरमा प्रभासको लुक निकै बदलिएको देखिएको छ ।

प्रभासको तौल निकै बढेको छ । बाहुबलीको लुकभन्दा पूरै फरक यो लुक देख्दा लाग्छ प्रभासले फिटनेसमा ध्यान दिन छाडेका छन् । यी तस्वीर फिल्म आरआरआरको लन्चिङको हो । यो फिल्ममा जुनियर एनटीआर र राम चरण मुख्य भूमिकामा हुनेछन् । कार्यक्रममा प्रभाससँगै बाहुबलीका निर्देशक एसएसराजामौली पनि देखिए ।

फिल्म साहोको सुटिङ अन्तिम चरणमा छ । प्रभासको यो लुक त्यसपछिको फिल्मको लागि बनाइएको हुनसक्ने अनुमान गरिएको छ । साहोपछि प्रभास निर्देशक राधाकृष्ण कुमारको फिल्ममा काम गर्नेछन् । फिल्मको नाम अहिलेसम्म निश्चित भइसकेको छैन । यही फिल्मको लागि प्रभासले नयाँ लुक बनाएको चर्चा छ । यो फिल्ममा प्रभासको अपोजिट पूजा हेगडे हुनेछिन् ।