सन् २०१६ को सफल चलचित्रमध्ये एक ‘सुल्तान’का जोडी अभिनेता सलमान खान र अभिनेत्री अनुष्का शर्मा फेरि एकसाथ देखिने भएका छन् । अली अब्बास जफरको फिल्म ‘सुल्तान’मा रोमान्स गरिसकेका यी जोडीले अब एक चर्चित निर्देशकसँग एकसाथ काम गर्ने भएका हुन् ।

बलिउड फिल्म उद्योगमा चर्चित मानिने निर्देशक सञ्जय लीला भन्सालीको फिल्ममा यी दुईले रोमान्स गर्ने बताइएको छ । भारतीय मिडियाका अनुसार सञ्जयको आउँदो ठूलो फिल्ममा सलमान र अनुष्काको जाडी बाँधिने भएको हो ।

यस फिल्ममा अभिनेता शाहरुख खान पनि रहने चर्चा छ । यस्तै यस फिल्ममा अर्की अभिनेत्री दीपिका पादूकोण पनि रहने चर्चा चलेको थियो । तर, अब उनको स्थानमा अनुष्का रहने बताइएको छ ।

खबरका अनुसार भन्साली अहिले सलमान र अनुष्काका लागि स्क्रीप्ट लेखनमा व्यस्त रहेका छन् । स्क्रिप्ट तयार हुनासाथ फिल्म छायाँकनमा जाने बताइएको छ । यद्यपि, यस फिल्मको नाम भने घोषणा गरिएको छैन ।

सलमान र भन्सालीले करिब १९ वर्षअघि फिल्म ‘हम दिल दे चुके सनम’मा सँगै काम गरेका थिए ।