आउँदो फागुन १७ गतेबाट देशव्यापी रिलिज हुन लागेको चलचित्र ‘क्याप्टेन’को नयाँ गीत सार्वजनिक भएको छ । नायक अनमोल केसीको मुख्य अभिनय रहेको सो चलचित्रको पहिलो गीत ‘रहर छ संगै’ बिहीबार सार्वजनिक भएको हो ।

यस गीतमा गायक सुगम पोखरेल र गायिका अञ्जु पन्तको आवाज रहेको छ । अर्जुन पोखरेलको संगीत र दिग्गज धरौलीको शव्द रचनामा बनेको यस गीतमा कोरियोग्राफर कविराज गहतराजले कोरियोग्राफी गरेका छन् ।

यस्तै गीतमा यस चलचित्रका मुख्यकलाकारद्वय अनमोल र नायिका उपसना सिंह ठकुरी फिचर्ड छन् । गीतको भिडियोमा अनमोल र उपसना निकै रोमान्टिक बनेका छन् ।

फुटबल खेलाडीको भूमिकामा देखिन लागेका अनमोलको सो चलचित्रले फागुन २० गतेको सार्वजनिक विदा पनि भेट्नेछ । फागुन २० गते सोमबारको महाशिवरात्रीका लागि यस फिल्मको रिलिज डेट फागुन १७ लाई तय गरिएको हो ।