इटालियन लिग सिरी ‘ए’ फुटबलमा डिफेण्डिङ च्याम्पियन युभेन्टसले आफ्नो अपराजित यात्रा कायमै राखेको छ । जारी लिगको १६ औं खेलेको युभेन्टसले गए रातिको खेलमा टोरिनोविरुद्ध १–० को जित निकाल्दै आफ्नो अपराजित यात्रा कायमै राखेको हो ।

टोरिनोको मैदान स्टेडियो ओलिम्पिको ग्राण्डे टोरिनोमा भएको प्रतिस्पर्धात्मक खेलमा स्टार खेलाडी क्रिस्टियानो रोनोल्डाको निर्णायक गोलमा युभेन्टस विजयी भएको हो ।

दुवै टोली पहिलो हाफ गोलबिहीन बनेका थिए । तर, दोस्रो हाफमा रोनाल्डोले गोल गर्दै युभेन्टसलाई ३ अंक दिलाए । उनले खेलको ७० औं मिनेटमा पेनाल्टीमार्फत् गोल गरे ।

यस जितसँगै उसले लिगमा अपराजित रहेर शीर्ष स्थान कायमै राखेको छ । उसले जारी लिगमा १५ खेलमा जित र एक खेलमा बराबरी खेल्दै ४६ अंक बनाएको छ । यस्तै दोस्रो स्थानको नापोलीभन्दा ११ अंकले युभेन्टस अघि रहेको छ । नापोलीसँग ३५ अंक छ ।

यस्तै आजको खेलमा निर्णायक गोल गरेको रोनाल्डो शीर्ष गोलकर्ता बनेका छन् । उनले जारी लिगमा ११ गोल गरेका छन् । उक्त सूचीमा ११ गोल गरेका जिरोनाका क्रिज्स्टोफ पाइटेक दोस्रो स्थानमा छन् भने तेस्रो स्थानमा १० गोलका साथ लाजियोका किरो इम्मोबाइल रहेका छन् ।