जारी इंग्लिस प्रिमियर लिगअन्तर्गत आज मध्य राति पाँच खेलहरु हुँदैछन् । २१ औं चरणको अन्तिम खेलअन्तर्गत् आज केही रोमाञ्चक खेलहरु हुँदैछन् ।

आज चौथो स्थानको चेल्सी, छैटौं स्थानको म्यानचेष्टर युनाइटेड र नवौं स्थानको वाटफोर्ड पनि प्रतिस्पर्धामा छन् । आजको पहिलो खेलमा चेल्सीले साउथह्याम्पटनसँग खेल्दैछ । चेल्सीले घरेलु मैदानमा साउथह्याम्टनलाई आमन्त्रण गरेको छ । यी दुईबीचको खेल राति १ः३० बजेदेखि सुरू हुनेछ ।

आजको खेलमा चेल्सीलाई तेस्रो स्थानको म्यान्चेष्टर सिटीसँग अंकदूरी घटाउने मौका छ । जारी लिगको अंक तालिकामा चेल्सी ४३ अंकका साथमा चौथो स्थानमा छ भने तेस्रो स्थानको सिटीसँग ४७ अंक छ ।

आजको खेलमा चेल्सीका फरवार्ड ओलिभर जिराउडले चोटका कारण साउथह्याम्टनसँगको खेल गुमाउनेछन् ।

यता आजको अर्को महत्वपूर्ण खेल भने म्यानचेष्टर युनाइटेड र न्यूकासलबीचको खेल हुनेछ । लिगको छैटौं स्थानमा रहेको भएपनि युनाइटेड पछिल्लो समय आफ्नो उच्च लयमा फर्कने कोशिस गरिरहेको छ । नवनियुक्त केयर टेकर प्रशिक्षकको नेतृत्वमा उत्कृष्ट प्रर्दशन गरिरहेको युनाईटेडले लगातार तीन खेलमा जित निकालेको छ ।

जारी लिगमा युनाइटेडसँग ३५ अंक छ । उसले २० खेल खेल्दा १० खेलमा जित, ५ खेलमा बराबरी र ५ खेलमा हार वेहाेरेकाे छ । आजको खेलमा लामो समयदेखि चोटका कारण मैदान बाहिर रहेका फरवार्ड एलिक्सस सान्चेज मैदान फर्किएका छन् ।

आज हुने खेलहरुः

१. चेल्सीविरुद्ध साउथह्याम्पटन– राति १ः३० बजे

२. बर्नेमाउथविरुद्ध वाटफोर्ड– राति १ः३० बजे

३. वेष्ट ह्यामविरुद्ध ब्राइटन– राति १ः३० बजे

४. हड्डर्सफिल्डविरुद्ध बर्नेली– राति १ः३० बजे

५. न्यूकासलविरुद्ध म्यानचेष्टर युनाइटेड– राति १ः३० बजे