ब्राजिलका लिजेण्ड खेलाडी जिकोले ब्राजिलका कप्तान तथा पेरिस सेन्ट जर्मेनका स्टार खेलाडी नेयमारलाई अर्जेन्टिनी स्टार खेलाडी लियोनल मेस्सी र पोर्चुगलका स्टार रोनाल्डो सगं तुलना गरेका छन् ।

पीएसजीबाट उच्च लयमा खेलिरहेका ब्राजिलियन खेलाडी नेयमारले २०१८ को बालोन डी’ओरमा टप १० मा पनि स्थान बनाएका थिएनन् । जबकी बार्सिलोनाबाट व्यवसायिक फुटबल खेलिरहेका मेस्सी र हाल इटालियन क्लब युभेन्टसमा आवद्ध रोनाल्डोले पाँच–पाँच पटक यस अवार्ड जितिसकेका छन् ।

बार्सिलोनाका पूर्व खेलाडीसमेत रहेका जिकोले एक पत्रिकालाई दिएको अन्तवार्तामा आफ्ना देशको युवा खेलाडी नेयमार स्टारद्वय रोनाल्डो र मेस्सीभन्दा कम नभएको टिप्पणी गरेका छन् । जिकोले नेयमारको खेल्ने शैली र पोजिशन दुवै एकदमै बलियो रहेको जिकिर गर्दै भने, ‘१० नम्बर जर्सी लगाएर पीएसजीबाट खेल्ने उनको ज्यादै ठूलो भूमिका रहने गरेको छ ।’

नेयमारले बढी तनाब लिएर खेल्ने गरेको कुरामा जिकोले नेयमार एक अद्भूत खेलाडी रहेको र हार्दा तनाब र जित्दा खुशी सबैलाई हुने जिकिर गरे । उनको खेल्ने क्षमता दुर्लभ किसिमको रहेको भन्दै नेयमार मेस्सी र रोनाल्डोभन्दा कम नभएको दाबी गरे ।