काठमाडौ । जारी ग्लोबल टी-२० लिग अन्तर्गत युनिभर्स बोस क्रिस गेलले अर्को आक्रामक पारी खेलेका छन् । गएराती सम्पन्न एडमन्टन रोयल्सविरुद्धको खेलमा गेल्को ९४ रनको आक्रामक पारीको मद्धतले भान्कोभर नाइट्सले ६ विकेटको जित हासिल गरेको छ ।

एडमंटनले दिएको १६६ रनको लक्ष्य पछाएको भान्कोभरले १६.३ ओभरमा ४ विकेट गुमाउदै लक्ष्य पुरा गरेको थियो । भान्कोभरका लागि गेलले ४४ बलमा ९४ रन बनाएर आउट भएका थिए । गेलले यस क्रममा ९ छक्का र ६ चौका प्रहार गरेका थिए । गेलले यस प्रतियोगीतामा यस अघि १२२ रनको शतकीय पारी खेलिसकेका छन् ।

त्यस्तै शोयब मल्लिकले १७ बलमा ३४ रन बनाए भने चडविक वाल्टनले १७ तथा डानियल साम्सले १६ रन बनाएका थिए ।

एडमंटनका बेन कटिंगले ३ विकेट लिए भने मोहमद हाफिजले एक विकेट लिएका थिए ।

यस अघि टस हारेर पहिला ब्याटिंग गरेको एडमंटनले २० ओभरमा ९ विकेट गुमाउदै १६५ रन बनाएको थियो । एडमंटनका लागि बेन कटिंगले सर्वाधि ७२ रन बनाएका थिए । कटिंगले ४१ बलमा ७ छक्का र ३ चौका प्रहार गर्दै ७१ रन बनाएका थिए । त्यस्तै मोहमद नवाजले २७ बलमा ४० रन बनाए । त्यस्तै जिम्मी निशामले २८ रन बनाएका थिए ।

भान्कोभरका बलर अली खान, साद बिन जाफर र हेडेन वाल्सले २-२ विकेट लिएका थिए । त्यस्तै शोएब मल्लिकले एक विकेट लिएका थिए ।

यो जितपछि भान्कोभर ४ खेलमा २ जित र एक खेलमा अंक बाड्दै ५ अंकसहित दोस्रो स्थानमा छ भने एडमंटन रोयल्सले अहिलेसम्म खेलेका चार वटै खेलमा हार बेहोरेको छ ।
ग्लोबल टी-२० लिग अन्तर्गत आज सन्दीप लामिछानेको टिम टोरन्टो नेशनल्स र ब्रम्पटन वोल्भ्सबीच खेल हुदै छ ।