काठमाडौं । सिरिज ‘ट्वान्टी फर्स्टलभ : सिजन अफ लभ टु’ को ट्रेलर रिलिज गरिएको छ । अर्को हप्ता शनिबारबाट एपिसियोड सुरु हुने सिरिजको शुक्रबार ट्रेलर रिलिज गरियो । ट्रेलरले प्रेमिल कथा बोलेको छ ।

एशियन म्युजिकको तर्फबाट निर्माण भएको यो सिरिज ‘ट्वान्टी फर्स्टलभ’को सफलता पछिको दोश्रो संस्करण हो । किशोर–किशोरीको प्रेम कथाको संग्रहको रुपमा आउँदै गरेको सिरिजले फरक–फरक प्रेमजोडीको फरक प्रेमकथा बोल्नेछ ।

निर्माण कम्पनि एसियन म्युजिकका ईश्वर गुरुङले पछिल्लो पुस्तालाई लक्षित गरेर तयार पारिएको सिरिज सबै वर्गका दर्शकहरुको लागि मनोरञ्जनको खुराक बन्ने दाबी गरे । पहिलो संस्करणलाई जस्तै माया र साथ दर्शकबाट पाउने उनको अपेक्षा छ ।

एशियन म्युजिकको अफिसियल युट्युव च्यानल र आइफिलिक्समा उपलब्ध हुने यो सिरिजमा कथा र निर्देशन विभोर पोखरेलको छ । कविता आले, संयोग गुरागाइँ, स्नेहा पौडेल, रिजन थापा, फिरोज बस्नेत, स्मृति श्रेष्ठ, कौशल नेपाल, रेजिना खड्का, राजु गायब, पङकज ठकुरी, आयुश्री घिमिरे, कमल अधिकारी, राज राठोर,ब्राह्मी पोखरेल, इभन गुरुङ र बिक्रम तामाङ अभिनयमा छन् ।

सिरिजमा मिलन शंकरको छायांकन, नहकुल खड्काको सम्पादन राजन तिमिल्सिना, चन्द्रसिंह घले र सञ्जिव पुडासैनीको संगीत रहनेछ ।