काठमाडौं । माल्दिभ्सको शीर्ष श्रेणी लिग धिवेहि प्रिमियर लिग अन्तर्गत आइतबारको खेलमा नेपाली फरवार्ड विमल घर्तीमगरले गोल गरेका छन् ।

टिसी स्पोर्ट्सबाट व्यवसायिक फुटबल खेल्दै आएका विमलले शीर्षस्थानमा रहेको डा ग्रान्ड विरुद्ध १-१ को बराबरीमा गोल गरे । पहिलो हाफमा विमलको गोलमा टिसीले अग्रता बनाएको थियो । उनले पेनाल्टी क्षेत्रभित्र पाएको कटब्याक पासलाई गोलमा परिणत गरेका थिए ।

तर दोस्रो हाफको ६० अौं मिनेटमा ग्रान्डेले वबाइडाको पेनाल्टीमा गोल फर्कायो । सिजनको सुरुवातमा एफए सिल्ड उपाधि जितेको टिसीले त्यसयता लिगमा भने अपेक्षित नतिजा हात पार्न सकेको छैन । डिफेन्स कमजोर हुँदा टोलीले लगातार अग्रता जोगाउन चुक्दै आएको छ । लिगको ६ खेलमा ९ अंक जोडेको टिसीले १० गोल गर्दै ५ गोल खाएको छ ।