काठमाडौं। न्यूजिल्याण्ड क्रिकेटले आफ्ना पूर्वकप्तान तथा बायाँहाते दिग्गज स्पिनर ड्यानियल भिटोरीका उपलब्धीहरुको सम्मान गर्दै उनलाई ठूलो सम्मान दिने निर्णय गरेको छ । क्रिकेट बोर्डले भिटोरीको जर्सी नम्बर ११ रिटायर गर्ने निर्णय गरेको हो । अब न्यूजिल्याण्डका लागि भविष्यमा खेल्ने कुनै पनि क्रिकेटरले ११ नम्बर जर्सी लगाउने छैनन् । यो जर्सी नम्बर भिटोरीको नाममा मात्र रहनेछ ।

यतिमात्र होइन बोर्डले ती सबै दिग्गज क्रिकेटरको जर्सी नम्बर रिटायर गर्नेछ जसले देशको लागि २०० भन्दा धेरै एकदिवसीय क्रिकेट खेलेका छन् । भिटोरीले न्यूजिल्याण्डका लागि सबैभन्दा धेरै २९१ एकदिवसीय खेलेका छन् । उनले ३०५ विकेट लिएका छन् र २२५३ रन बनाएका छन् । यसअघि भारतको क्रिकेट बोर्डले समेत सचिन तेन्दुलकरको १० नम्बर जर्सीलाई अनौपचारिक रुपमा रिटायर गरिसकेको छ ।