काठमाडौं। इंग्लिस प्रिमियर लिग (इपीएल) को नयाँ सिजन शनिबार राति लिभरपुल र नर्विच सिटीबीचको खेलसँगै शुरु भइसकेको छ । प्रिमियर लिगको पहिलो चरणका ७ खेल सकि सकेका छन् ।

आइतबार प्रिमियर लिगको पहिलो चरणमै दुई ठूला क्लब आमने सामने हुँदैछन् । यी दुई टोलीलाई यो नयाँ सिजनको प्रिमियर लिग उपाधि दाबेदार टोलीका रुपमा हेर्न थालिएको छ । फुटबल विश्लेषकहरुले दुई ठूला टोलीको शुरुवातमै खेल्नु पर्दा खासै मजा भने नआउने भन्दै विश्लेषण गर्दै आएका छन् ।

युनाइटेड र चेल्सीबीचको खेल नेपाली समय अनुसार राति सबा ९ बजे युनाइटेडको होम ग्राउण्ड ओल्ड ट्राफोर्डमा हुनेछ । युनाइटेड आफ्नो होम ग्राउण्डमा चेल्सीलाई कमजोर साबित गर्ने लक्ष्यमा रहेको छ । यद्यपि युनाइटेडका स्टार खेलाडी पाउल पोग्वा ‘ब्याक पेन’ र एलेक्स सान्चेजको खुट्टाको गोली गाँठोमा चोट लागेपछि आइतबारको खेलमा मैदान उत्रिने वा नउत्रिने भन्ने स्पष्ट भइसकेको छैन ।

तर, आइतबारको खेलमार्फत यो सिजनबाट युनाइटेडसँग किर्तिमानी मूल्यमा क्लब भित्रीएका ह्यारी मागुइरीले भने डेब्यु गर्नेछन् ।

यता, चेल्सी पनि आफ्नो पहिलो खेलमा जीत हात पार्दै उत्कृष्ट शुरुवात गर्ने लक्ष्यमा रहेको छ । चेल्सीका पनि एनगोलो कान्टेको घुँडामा चोट लागेका कारण उनी युनाइटेडविरुद्धको खेलमा मैदान उत्रिन्छन् वा उत्रिदैनन् भन्ने आधिकारीक समाचार आउन सकेको छैन् भने रुवेन लुफ्टुस चेक, एन्टोइनो रुडिगर र कलुम ह्युडोसन ओडि अहिलेसम्म टिम बाहिर नै रहेका छन् ।

युनाइटेडले प्रिमियर लिगको इतिहासमै सन् १९५८ पछि लिगमा आफ्नो पहिलो खेल चेल्सीसँग, त्यो पनि घरेलु मैदानमै आयोजना गरेको यो पहिलो पटक हो । युनाइटेडले प्रिमियर लिगका पछिल्लो १३ खेलमा खेल खेल बराबरी र ५ खेलमा हार व्यहोरेको छ ।

तर, घरेलु मैदानमा भएका ६ खेलमा भने युनाइटेडले १ पनि हार व्यहोरेको छैन । जहाँ उसले ६ मध्ये २ खेलमा जीत हात पर्दा ४ खेल बराबरी खेलेको छ ।