काठमाडौं । नेपाली राष्ट्रिय टोलीका मिडफिल्डर रोहित चन्द रहेको पर्सिजा जकार्ताले इन्डोनेसियन लिगा वानमा बराबरी खेल्दै अंक बाडेको छ ।

शुक्रबार भएको खेलमा जकार्ताले मदुरा युनाईटेडसँग २–२ गोलको बराबरी खेलेको हो । मदुराको मैदानमा सुरुवाती अग्रता जोगाउन नसक्दा जकार्ता बराबरीमा रोकिएको हो ।

जकार्ताको लागि मार्को सिमिकले दुई गोल गरे । मदुराका डेभिड लाली र अल्फाथ फाथिरले एक एक गोल गरे । मदुराविरुद्धको खेलमा रोहितले पुरै ९० मिनेट मैदानमा बिताएका थिए ।

यो बराबरीसँगै साविकको विजेता समेत रहेको जकार्ताले १० खेलबाट ९ अंक जोडेको छ । र, जकार्ता लिगको १७ औं स्थानमा छ । १३ खेलबाट २३ अंक जोडेको मदुरा तेस्रो स्थानमा छ ।