काठमाडौं। पूर्व राजदूत केशव झाको हत्या गरेको आरोपमा प्रहरीले झाकै घरमा सुरक्षा गार्डका रुपमा काम गरेका काभ्रेका कान्छाराम तामाङलाई पक्राउ गरेको छ । तामाङलाई काठमाडौं प्रहरी परिसरको टोलीले शुक्रबार काभ्रेबाट पक्राउ गरेको हो ।

केशव झाको हत्या प्रकरणमा उनलाई यसअघि अपराध महाशाखाको टोलीले पक्राउ गरेको थियो । तर, जिल्ला अदालत काठमाडौंले १५ हजार धरौटीमा उनलाई रिहा गरेको थियो ।

स्वर्गीय झाकी श्रीमतीले किटानी जाहेरी दिएपछि उनलाई पुनः पक्राउ गरिएको प्रहरीले जनाएको छ । गत वर्ष भदौमा ८० वर्षीय झा बबरमहलस्थित आफ्नै घरमा मृत अवस्थामा भेटिएका थिए । टाउको र घाँटीमा चोट लागेको अवस्थामा मृत भेटिएका उनीमाथि किचनको चक्कु प्रहार भएको आशंका गरिएको थियो ।