चितवन। आत्महत्या दुरुत्साहन अभियोगमा जिल्ला प्रहरी कार्यालय चितवनमा हिरासतमा रहेका कार्यक्रम प्रस्तोता रवि लामिछाने, युवराज कँडेल र अस्मिता कार्कीलाई आज जिल्ला अदालत चितवनमा पेश गरिँदैछ । जिल्ला अदालत चितवनले उनीहरुलाई पाँच दिन हिरासतमा राखेर अनुसन्धान गर्न दिएको म्याद सकिएको छ ।

आज उनीहरुलाई अदालत पेश गर्ने क्रममा हुन सक्ने अप्रिय घटनालाई रोक्न ठूलो संख्यामा प्रहरी परिचालन गरिएको छ । सुरक्षा व्यवस्थामा कडाइ गर्न हेटौंडाबाट झण्डै १ हजारको संख्यामा थप प्रहरी बल झिकाइएको बताइएको छ ।

प्रहरीले सरकारी वकिलमार्फत तीनैजनालाई अनुसन्धानको लागि थप म्याद माग्ने तयारी गरेको छ । तीन जना अभियुक्त मध्ये युवराज कँडेल र अस्मिता कार्कीको बयान पूरा भएको भए पनि रविको बयान आंशिक रुपमा मात्रै सकिएको छ । बयान नसकिएकै कारण पनि उनीहरुलाई थप अनुन्धानको लागि म्याद थप गरिने सम्भावना देखिएको छ ।

प्रशानले भरतपुरको चौबीसकोठीदेखि मालपोत चोकसम्म निषेधित क्षेत्र घोषणा गरेको छ तर रविका समर्थकले चौबीसकोठी चोकमा ठूलो प्रदर्शनको तयारी गरिरहेका छन् । उनीहरुले रविलाई रिहा गराउन दबाब दिने तयारी गरेका छन् । रवि समर्थकको तयारी र प्रशासनको तयारी हेर्दा आज चितवनमा ठूलै झडप हुन सक्ने आशंका गरिएको छ । प्रशासन सम्भावित अप्रिय घटना रोक्न प्रयासरत छ ।

सम्भावित अप्रिय घटना रोक्न र रविको पक्षमा हुने प्रदर्शनलाई नियन्त्रण गर्न जिल्ला प्रहरी कार्यालय परिसरमा बिहानैदेखि तयारी अभ्यास भइरहेको छ । जुन भवनको आँगनमा अभ्यास भइरहेको छ त्यही भवनभित्र एक कोठामा रहेका रवि लामिछानेले आफ्ना समर्थकलाई रोक्न भइरहेको तयारी महसुस गरिरहेका छन् ।

रवि न्यायिक हिरासतमा अन्य बन्दीसरह सामान्य अवस्थामा छन् । उनलाई अन्य ८–१० जना बन्दीसँगै राखिएको छ । उनले हिरासतमा बस्दाको समय पुस्तक पढेर बिताइरहेका छन् । उनलाई भेट्न जानेले उनलाई पुस्तक लगिदिने गरेका छन् । यसबाहेक रविले आफूसँग रहेका बन्दीहरुको कथाव्यथा सुनेर समय बिताएका छन् ।

हिजोसम्म रविलाई भेट्न चाहने शुभचिन्तकहरुलाई भेट्न दिइएको भए पनि आज भेटघाटमा कडाइ गरिएको छ । आज परिवारका सदय बाहेक अन्यलाई भेट्न दिइएको छैन । रविका कानुन व्यवसायी, श्रीमती निकिता लगायतका शुभचिन्तकहरु उनलाई रिहा गराउने तयारीमा सक्रिय छन् ।