काठमाडौं । नेपाली राष्ट्रिय टोलीका मिडफिल्डर रोहित चन्द आवद्ध क्लब पर्सिजा जकार्ताले इन्डोनेसियन लिगा वानमा बराबरी खेलेको छ ।

शनिबार भएको खेलमा जकार्ताले पर्सेबाया सुरबायासँग १–१ गोलको बराबरी खेलेको हो । सुरुवाती गोलको अग्रता जोगाउन नसक्दा जकार्ताले बराबरी खेलेको हो ।

खेलको ६९ औं मिनेटमा मार्को सिमिकले गोल गर्दै जकार्तालाई अग्रता दिलाएका थिए । तर, खेलको ८० औं मिनेटमा मिस्बाकुस सोलिकिनले पेनाल्टीमा गोल गर्दै खेल १–१ को बराबरीमा ल्याए । पर्सेबायाविरुद्धको खेलमा रोहितले पुरै ९० मिनेट मैदानमा बिताएका थिए ।

बराबरीसँगै साविकको विजेता समेत रहेको जकार्ताले १२ खेलबाट १३ अंक जोडेको छ । जकार्ता लिगको १४ औं स्थानमा छ । पर्सेबायाको १६ खेलबाट २२ अंक रहेको छ ।