काठमाडौं। पत्रकार शालिकराम पुडासैनीको ‘डाइङ डिक्लेरेशन’ मानिएको भिडियो अरु कसैको सहयोगमा रेकर्ड भएको चितवन जिल्ला अदालतले ठहर गरेको छ । उनको मोवाइलमा रेकर्ड भएको भिडियो रेकर्ड भएको बेला त्यहाँ शालिकरामसँगै अन्य कोही पनि उपस्थित रहेको अदालतले हिजो दिएको आदेशमा भनिएको छ । यही भिडियोका कारण रवि लामिछाने, युवराज कँडेल र अस्मिता कार्की पक्राउ परेका थिए ।

आदेशमा भिडियो रेकर्ड गर्दा र आत्महत्या गर्दाको मनस्थिती फरक रहेको भनिएको छ । भिडियो रेकर्ड गर्दा शालिकराम भित्री वस्त्रमा देखिएको तर आत्महत्या गर्दा पाइन्ट, सर्टसहितको पहिरनमा देखिएको अवस्थाले उनको मनथिति फरक भएको ठहर गरिएको हो । पुडासैनीले घटनास्थलको सो कोठामा उपयुक्त उचाइको स्थानमा आफ्नो मोबाइल भिडियो रेकर्ड मोडमा स्थिर राखी भिडियो खिचेको हो भने घटनास्थल मुचुल्का र बरामदी मुचुल्कामा मोबाइल त्यस्तो स्थानमा राखेको अवस्थामा भेटिएको भन्ने व्यहोरा उल्लेख नभएको पनि आदेशमा उल्लेख छ ।