काठमाडौं। रियल मड्रिडका कोच जिनेदिन जिदानले रियलको यो सिजनको लागि ट्रान्सफरको काम अझै पूरा नभएको र अझै थप खेलाडीको ट्रान्सफर हुन सक्ने संकेत गरेका छन् । ट्रान्सफर विन्डो भोलि सोमबार बन्द हुँदैछ । रियल यो समयमा १ वा दुई खेलाडी अनुबन्ध गर्न सकिनेमा आशावादी छ ।

‘सोमबारसम्म जे पनि हुन सक्छ’ भिल्लारियलसँग खेलअघिको पत्रकार सम्मेलनमा जिदानले भने ‘एउटा बम, २ वटा बम… तर महत्वपूर्ण कुरा भोलिको खेल हो ।’ जिदान स्पष्ट रुपमा यो समरमा पउल पोग्बालाई अनुबन्ध गर्न चाहन्थे । पोग्बालाई आफूलाई चाहिएको खेलाडीको रुपमा पहिचान गरिसकेपछि जिदान उनलाई अनुबन्ध गर्न बेताब थिए तर क्लवले यस्तो गरेन । यद्यपि उनी आफ्नो टिमसँग खुसी नै रहेको बताउँछन् ।

‘अन्ततः मसँग भएको टिम यही हो’ उनले भने ‘यी खेलाडीमा म गर्व गर्छु, मेरो लागि यी खेलाडीहरु सर्वोत्कृष्ट छन् ।’ उनले आफ्नो टिमसँग कुनै गुनासो गर्न नसक्ने बताउँदै कुनै पनि कोचले त्यो टिमलाई प्रशिक्षण दिन चाहने दावी गरे । लगातार खेलाडी चोटग्रस्त हुँदा रियललाई निकै नोक्सानी भएको छ र यसले जिदान तनावमा छन् । ‘घाइते खेलाडी देख्दा म खुसी हुन सक्दिन’ उनले भने ‘तर यस्ता कुराहरु हुन्छन्, अरु टिममा पनि हुन्छन् । मलाई आशा छ उनीहरु छिटै ठिक हुनेछन् ।’