काठमाडौं। प्रभा र श्रद्धा कपूरको फिल्म साहोले समीक्षकलाई खासै प्रभावित गर्न सकेन । यद्यपि फिल्मले बक्स अफिसमा भने राम्रो बिजनेस गरिरहेको छ । फिल्मको दमदार प्रमोसनले गर्दा फिल्मको कमाइ राम्रो भइरहेको छ । यति हुँदाहुँदै पनि ३५० करोडको ठूलो बजेटमा बनेको यो फिल्मको लगानी निर्माताले कसरी उठाउलान् भन्ने प्रश्न भने अझै पनि चर्चामा छ ।

स्पटब्वायले आफ्नो एक रिपोर्टमा युभी क्रिएसन्सका निर्मातासँगको कुराकानी छापेको छ । निर्माता श्यामसँग ‘१५० करोडको लगानीमा बनाउने भनेर सुरु गरिएको साहो बन्दै जाँदा यसको बजेट ३५० करोड पुग्यो । अब यो पैसा उठाउन निर्माणपक्षसँग कस्तो योजना छ ?’ भनेर सोधिएको थियो । यो प्रश्नको जवाफ दिने क्रममा श्याम अल्मलिएको रिपोर्टमा उल्लेख छ ।

उनले भने ‘यो अनुमान मात्र हो । तपाइँहरु नै पहिले १५० करोडको आँकडा लिएर आउनुभयो अनि पछि भन्नुभयो कि फिल्म ३५० करोडमा बनेको छ ।’ त्यसपछि निर्मातालाई फिल्मका हिरो प्रभासले नै कैयौं अन्तरवार्तामा फिल्मको बजेट ३५० करोड भएको बताएको स्मरण गराइएपछि निर्माता श्यामले भने ‘त्यसो भए निर्माण पक्षले केही योजना त पक्कै बनाएको होला कि लगानी कसरी उठाउने ?’