काठमाडौं । सन् २०२२ मा कतारमा आयोजना हुने फिफा विश्वकप छनोट अन्तर्गत एसिया छनोटको दोस्रो चरणमा जोर्डनले विजयी शुरुआत गरेको छ ।

बिहीबार भएको खेलमा जोर्डनले चाईनिज ताईपेलाई उसैको मैदानमा २–१ गोल अन्तरले पराजित गरेको हो ।

घरेलु टोलीविरुद्ध जोर्डनले पहिलो हाफमै २ गोल गरेको थियो । खेलको १९ औं मिनेटमा बहा फैसलले गोल गर्दै जोर्डनलाई सुरुवाती अग्रता दिलाए । ३७ औं मिनेटमा अहमेद समिरले गोल गरेपछि जोर्डन पहिलो हाफमा २–० ले अघि रह्यो ।

ताईपेले दोस्रो हाफमा एक गोल फर्काए पनि टोलीको हार टार्न सकेन । खेलको ८१ औं मिनेटमा वेन चिन हाओले ताईपेका लागि सान्त्वना गोल फर्काएका थिए ।

जितसँगै समूह ुबीु को जोर्डनले ३ अंक जोडेको छ । ताईपेले भने हारबाट प्रतियोगिताको सुरुवात गरेको छ । यस समूहमा नेपालसहित अष्ट्रेलिया, चाईनिज ताईपे, कुवेत र जोर्डन रहेको छन् ।

यसै समूहमा रहेको नेपालले आज राति कुवेतसँग खेल्दैछ । नेपाल कुवेतबीचको खेल नेपाली समय अनुसार पौने ११ बजे हुनेछ ।