एजेन्सी। बिहीबार देओल परिवारको तेस्रो पिढीले बलिउडमा आफ्नो आगमनको घोषणा गरेको छ । सनी देओलका छोरा करण देओलको डेब्यू फिल्म ‘पल पल दिल के पास’को ट्रेलर रिलिज भएको छ । सनी देओल यो फिल्मबाट छोरा करणलाई बलिउडमा लञ्च गर्दैछन् । फिल्मको हरेक प्रमोसनल कार्यक्रममा सनी छोरासँगै देखिएका थिए तर ट्रेलर लञ्च कार्यक्रममा भने उनी बेपत्ता भए । कार्यक्रममा उनलाई नदेख्दा धेरैलाई यसबारे चासो भयो ।

फिल्मको ट्रेलर लञ्च कार्यक्रममा धर्मेन्द्र आफ्ना नातीलाई हौसला दिन पुगेका थिए । फिल्मकी हिरोइन सहर बाम्बा पनि कार्यक्रममा थिइन् । तर त्यहाँ मिडियाले सनी देओललाई खोजिरहेका थिए किनकि सनी करणका पिता मात्र नभइ यो फिल्मका निर्देशक समेत हुन् । सनी कार्यक्रममा नहुनुको कारण छोरा करणले खुलासा गरे । करणका अनुसार सनी बटाला फ्याक्ट्री विष्फोटका पीडितलाई भेट्न गुरदासपुर गएका थिए ।

यो दुर्घटनामा २३ जनाको ज्यान गएको थियो । गुरदासपुरमा अवैध पटाका फ्याक्ट्रीमा विष्फोट भएको थियो । सनी गुरदासपुरका सांसद हुन् त्यसैले जनप्रतिनिधिको रुपमा उनी त्यहाँ गएका थिए । उनी घटनाको खबर पाउनासाथ त्यता गएको बताइएको छ । फिल्म पल पल दिल के पास २० सेप्टेम्बरमा रिलिज हुँदैछ ।