कास्की । गण्डकी प्रदेशका मुख्यमन्त्री पृथ्वीसुब्बा गुरुङले शान्ति प्रक्रियालाई पूर्णता दिन सरकार र पार्टीको ध्यान जानुपर्नेमा जोड दिएका छन्।

जनयुद्धका शहीद सुरेश वाग्ले र भीमसेन पोखरेलको २०औं स्मृति दिवसको अवसरमा नेकपा गण्डकी प्रदेश कमिटीले आज पोखरामा आयोजना गरेको स्मृति कार्यक्रममा उनले शान्ति प्रक्रियासँग सम्बन्धित कतिपय काम अझै बाँकी रहेको उल्लेख गरे।

दशवर्षे युद्धका क्रममा बेपत्ता भएका व्यक्तिका परिवार अझै पनि पीडामा रहेकाले बेपत्ता छानबिन आयोगमार्फत बेपत्ता पारिएकाहरुको अवस्था सार्वजनिक गरिनुपर्ने माग गरे।

गण्डकी प्रदेशमा विभिन्न चरणमा शहीद भएका र बेपत्ता भएकाको अवस्था खोजबिन गरेर यथार्थ सार्वजनिक गरिने र आश्रित परिवारका सदस्यका लागि शिक्षा र जीविकोपार्जनका कार्यक्रम ल्याइने मुख्यमन्त्री गुरुङले स्पष्ट पारे।

पार्टीका स्थायी कमिटी सदस्य एवं प्रदेश कमिटीका इन्चार्जसमेत रहनुभएका मुख्यमन्त्री गुरुङले देश, जनता र पार्टीप्रति इमान्दार भएर समाजवाद निर्माणको अभियानमा लाग्ने हो भने मात्र शहीदका सपना साकार हुने र उनीहरुप्रति सच्चा सम्मान हुने भएकाले त्यसतर्फ लाग्न कार्यकर्तालाई निर्देशन दिए।

प्रदेश कमिटी अध्यक्ष हितराज पाण्डेले शहीद वाग्ले सरल व्यक्तित्व, वैचारिक, राजनीतिक दृष्टिकोणले स्पष्ट र कुशल सङ्गठन भएको स्मरण गर्दै उनको हत्याले तत्कालीन नेकपा माओवादीलाई ठूलो क्षति पुगेको चर्चा गरे।

कार्यक्रममा शहीद पत्नी दुर्गा पहारी र बेपत्ताका परिवारकी तेजकुमारी पौडेलले शहीद तथा बेपत्ताका परिवारलाई पार्टीले बेवास्ता गर्न नहुनेमा जोड दिइन्।