काठमाडौं। सरकारी कर्मचारीको लापरवाहीका कारण जीवित व्यक्तिलाई नै मृत घोषित गरिएको घटना सार्वजनिक भएको छ । ७ जना वृद्धहरुलाई जीवित छँदै मृत घोषित गरिएको हो । भारतको उत्तर प्रदेश राज्यको बदायूँ जिल्लामा गाउँ पञ्चायतका सचिवले सरकारी रेकर्डमा ती ७ जनाको मृत्यु भइसकेको रिपोर्ट चढाएका थिए । आज तकको समाचार अनुसार सातै जना वृद्धहरु आफू जीवित भएको प्रमाणसहित जिल्ला मजिस्ट्रेटकहाँ उजुरी लिएर पुगेपछि मजिस्ट्रेटले गाउँ पञ्चायतका सचिवलाई कारवाही गर्न निर्देशन दिएका छन् ।

जिल्लाको हुसैनपुर करौतिया गाउँका निशार हुसैन, अफसर, अलाउद्दीन, चम्पा, मिराजन, अकिला र अफसर गरी ७ जनालाई गाउँ पञ्चायतका सचिव नवीन कुमार माहेश्वरीले सरकारी रेकर्डमा मृत घोषित गरेका हुन् । सातै जनाले यो कुरा तब थाहा पाए जब उनीहरु बैंकमा पेन्सनको पैसा लिन पुगेका थिए । बैंकमा जाँदा उनीहरुले थाहा पाए कि समाज कल्याण परिषदको तर्फबाट उनीहरुको खातामा पैसा आएकै छैन किनकि विभागमा त उनीहरुको मृत्यु भइसकेको रिपोर्ट पठाइएको थियो ।

बैंकमा आफ्नो मृत्यु भइसकेको रेकर्ड भेटिएपछि उनीहरु पूर्व प्रधान शहंशाह आलमकहाँ गए । आलमले विकास भवन गएर रेकर्ड हेर्दा सातै जनाको मृत्यु भइसकेको रेकर्ड भेटियो । त्यपछि सातैजना डिएमकहाँ पुगे । डिएम दिनेश कुमारले समाज कल्याण विभागका अधिकारीसँग सोधपुछ गर्दा कागजी रुपमा सातै जनाको मृत्यु भएको पुष्टि भयो । डिएमले पंचायतका सचिवलाई कडा कारवाही गर्न निर्देशन दिँदै यो घोर लापरवाही भएको र यसलाई सहन नसकिने बताए ।