काठमाडौं। शुक्रबारबाट प्रदर्शनमा आएको चलचित्र ‘पासवर्ड’लाई दर्शकले सकारात्मक प्रतिक्रिया दिएका छन्।

विशेषगरी चलचित्रको कथावस्तु र एक्सनको पाटोलाई दर्शकले रुचाएका छन्। शनिबार काठमाडौंको कुमारी हलमा चलचित्र हेरेका दर्शकले यसको कथावस्तु, एक्सनसंगै कलाकारको अभिनय मन परेको बताए।

भिलेनको भूमिकामा देखिएका अनुपविक्रम शाहीको काम उत्कृष्ट लागेको दर्शकको प्रतिक्रिया छ।

कुमारी हलमा चलचित्रका निर्देशक, निर्माता तथा कलाकारले दर्शकसंगै बसेर चलचित्र हेरेका थिए। निर्देशक सम्राट बस्नेतले दर्शकको प्रतिक्रियाले आफूलाई उत्साहित बनाएको बताए। ‘दर्शकसंग बसेर चलचित्र हेर्यौ। सबैले मन पराउनुभएको छ। डेब्यू निर्देशनमा दर्शकबाट पाएको सकारात्मक प्रतिक्रियाबाट सन्तुष्ट छु’– उनले भने।

चलचित्रको शुक्रबारको ब्यापार सन्तोषजनक थिएन्। शनिबार भने चलचित्रले औषत ब्यापार गरेको निर्माण यूनिटले जनाएको छ। आउँदा दिनको चलचित्रको ब्यापार बढनेमा निर्माण यूनिटको विश्वास छ।

बलिउड अभिनेत्री सन्नी लियोनीको अभिनय रहेका कारण पनि छायाँकनबाटै चलचित्र चर्चामा थियो। चलचित्रको एक आइटम गीतमा सन्नीले नृत्य गरेकी छन्। गत बिहीबार राजधानीमा आयोजत चलचित्र प्रिमियर शोमा सन्नी स्वयंम उपस्थित थिइन्।

नेपालबाट चोरी गरि लण्डन पुर्याइएको मूर्ति फर्काउन गरिएको संघर्षको कथामा आधारित चलचित्रमा अनुपविक्रम शाही, विक्रम जोशी, बुद्दि तामाङ, रविन्द्र झा, प्रविण खतिवडा, धिरेन शाक्य, छुल्ठिम गुरुङ, एभरेस्ट सुर्य बोहरालगायतका कलाकारको अभिनय रहेको छ।

नेपाल र लण्डनमा छायांकन गरिएको चलचित्रमा अमित बस्नेत र हिराल जोशीको लगानी रहेको छ।