लण्डन (बीबीसी)। अन्तर्राष्ट्रिय मानव अधिकारवादी संस्था एमनेस्टी इन्टरनेशनलले कतारमा कामदारहरूमाथि निरन्तर रूपमा गलत व्यवहार जारी राखिएको जनाएको छ।

सन् २०२२ को विश्वकप फुटबल आयोजक कतारले प्रतियोगिताअघि कामदारहरूको अधिकारमा सुधार गरिने प्रतिबद्धता जनाएको थियो। एमनेस्टीले आफ्नो एउटा नयाँ प्रतिवेदनमा कतारमा सयौँ कामदारहरूले बिना तलब काम गरिरहेको जनाएको छ।

कामदारहरूको हितका लागि सघाउन भनेर स्थापना गरिएको नयाँ संयन्त्रले समेत उनीहरूको अधिकार सुरक्षित गर्न नसकेको उक्त संस्थाको भनाई छ। एमनेस्टीले कतार प्रशासनलाई श्रम शोषणको लाजमर्दो वास्ताविकतालाई अन्त्य गर्न आग्रह गरेको छ।

एमनेस्टी इन्टरन्याशनलका विश्व मामिला सम्बन्धी उप(निर्देशक स्टिफन कक्बर्नले भने, ‘सन् २०२२ को विश्वकपअघि सुधारहरू गर्ने महत्त्वपूर्ण प्रतिबद्धता व्यक्त गरेपनि कतार अनैतिक रोजगारदाताहरूका लागि खेल मैदान भएको छ।’

आफ्नो पारिवारिक अवस्थामा सुधार गर्ने उद्देश्यले आप्रवासी कामदारहरू कतार जाने गर्ने तर महिनौँपश्चात् एक पैसा नलिइकन घर फर्कने गरेको उप(निर्देशक कक्बर्नले बताए।

त्यस्ता कामदारको सहायताका लागि स्थापना गरिएका संयन्त्रले पनि कामदारलाई सहायता गर्न असफल भएको एमनेस्टीको भनाइ छ।

सो प्रतिवेदनमा सयौँ रोजगारदाताहरूले कतिपय कामदारलाई बिना तलब स्वदेश फर्काउने गरिएको उल्लेख छ। सन् २०१७ नोभेम्बरमा अन्तर्राष्ट्रिय श्रम संगठनसँग एउटा सम्झौतामा हस्ताक्षर गरेपछि कतारले कामदारको अवस्था सुधार गर्न नयाँ कानुनहरू पारित गरेको थियो।

त्यस्ता सुधारका क्रममा आप्रवासी कामदारले देश छाड्न वा काम परिवर्तन गर्नका लागि रोजगारदाताको अनुमति लिनुपर्ने प्रणालीको अन्त्य पनि गरिएको थियो।

नयाँ कानुन अनुसार अस्थायी रूपमा न्यूनतम ज्यालाको पनि व्यवस्था गरिएको छ। त्यस्तै कामदारको बीमा र विवाद समाधान गर्ने संयन्त्रहरू पनि बनाइएका छन्। एमनेस्टीको अध्ययन विश्वकपसँग सिधा सम्बन्ध नभएका कम्पनीहरूमाथि केन्द्रीत रहेको छ।

कतारले सन् २०२२ मा हुने विश्वकप फुटबलको आयोजक भन्ने तय भएदेखि नै त्यहाँका कामदारहरूको अवस्थाबारे उसको आलोचना हुँदै आएको छ।

विश्व फुटबलको सर्वोच्च निकाय फिफाले उक्त प्रतिवेदनमा प्रतिकृया जनाउँदै ‘विश्वकप कामदारको अधिकारलाई निकै गम्भीर रूपमा लिएको’ बताएको छ। फिफाले त्यसलाई आफ्नो मानवअधिकार नीतिसँग जोडेर हेरेको बताएको छ।