भुटानसँग हारेपछि प्रशिक्षक श्रेष्ठले के भने?
![भुटानसँग हारेपछि प्रशिक्षक श्रेष्ठले के भने?](https://www.dcnepal.com/wp-content/uploads/2019/09/CHET-NARAYAN.jpg)
काठमाडौं । नेपाली यू–१८ फुटबल टिममा मुख्य प्रशिक्षक चेत नारायण श्रेष्ठले पाएको मौका सदुपयोग गर्न नसक्दा यू–१८ साफ च्याम्पियनसिपको दोस्रो खेलमा भुटानसँग हार व्यहोर्नु परेको बताएका छन् ।
एपीएफको हलचोक मैदानमा आइतबार नेपालले भुटानसँग ३–० गोलको लजास्पद हार व्यहोरेको थियो । हारपछि पोष्ट म्याच कन्फरेन्समा बोल्दै प्रशिक्षक श्रेष्ठले खेलाडीले सिकाए अनुसारको प्रदर्शन गर्न नसकेको बताए ।
सुरुमा पाएको राम्रो मौकाहरु गुमाउदा गार्हो भयो । पानीले गर्दा पनि खेलाडीले खेल्न सकेनन्,’ प्रशिक्षक श्रेष्ठले भने, ‘मैले सिकाएको अनुसार खेलाडीले देखाउँन सकेनन् । खेलाडी र दुवैको दोष हो यो ।’
पहिलो हाफमा १–० ले पछि परेको नेपालले भुटानसँग दोस्रो हाफमा २ गोल खाएको थियो । हारसँगै समूह ए मा रहेको नेपालको सेमिफाइनल पुग्ने सम्भावना कमजोर बनेको छ । नेपालले २ खेलमा १ अंक जोडेको छ ।
अब नेपालको सेमिफाइनल यात्रा भुटान र माल्दिभ्सबीचको खेलले तय गर्नेछ । उक्त खेलमा भुटानले माल्दिभ्सलाई ४–० को फराकिलो अन्तरले पराजित गरे नेपाल सेमिफाइनल पुग्ने छ । बराबरी र भुटान पराजित भए नेपाल समूह चरणबाट बाहिरिने छ ।
प्रशिक्षक श्रेष्ठले नेपालको सेमिफाइनल सम्भावना बाँकी रहेको भएपनि गणितीय सम्भावनामा आश नगरेको बताए ।
यस्तै श्रेष्ठले भुटानले उत्कृष्ट खेलेको र भुटानलाई कमजोर मान्न नहुने बताए । ‘भुटान अहिले सम्म कमजोरी थियो, अब साउथ एसियामा कमजोरी कुनै टिम छ भन्ने हुन्न । भुटानले राम्रो गर्यो । फिजिकलमा भुटान बलियो रहेछ,’ श्रेष्ठले थपे, ‘भुटान अहिलेसम्म कमजोर थियो, अब साउथ एसियामा कुनै टिम कमजोर छैन ।’
Facebook Comment