एजेन्सी । रियल मड्रिड स्पेनिस ला लिगा फुटबलको शीर्ष स्थानमा उक्लिएको छ । बुधबार राति भएको खेलमा ओसासुनालाई २–० गोल अन्तरले पराजित गर्दै रियल शीर्ष स्थानमा उक्लिएको हो ।

घरेलु मैदानमा रियललाई जित दिलाउन भेनीसीएस जुनियर र रोड्रीगोले एक एक गोल गरे । रियलले दुवै हाफमा एक एक गोल गरेको थियो । सान्टियागो बेर्नाबेउमा खेलको ३६ औं मिनेटमा जुनियरले गोल गर्फ्दै रियललाई अग्रता दिलाएका थिए । त्यसपछि ७२ औं मिनेटमा रोड्रीगोले गोल गर्दै रियललाई २–० को जित दिलाए ।

जितसँगै शीर्ष स्थानमा उक्लिएको रियलले ६ खेलबाट १४ अंक जोडेको छ । ओसासुनाको ६ खेलमा ७ अंक रहेको छ । रियल एट्लेटिको मड्रिडलाई एक अंकले पछि पार्दै शीर्ष स्थानमा उक्लिएको हो । एट्लेटिकोको ६ खेलमा १३ अंक रहेको छ ।

एट्लेटिकोले मंगलबार राति मालोर्कालाई २–० ले हराएको थियो । १० खेलाडीमा सिमित बनेको एट्लेटिकोलाई जित दिलाउन डिएगो कोस्टा र जोया फेलिक्सले एक एक गोल गरे । यस्तै खेलको ७७ औं मिनेटमा अल्भारो मोरटाले दोहोरो पहेलो कार्डसहित रातो कार्ड पाउँदा एट्लेटिको १० खेलाडीमा समेटिएको थियो ।