काठमाडौं । लामो समयपछि बक्स अफिसमा नेपाली चलचित्रले उत्साहजनक व्यापार गरेको छ । असोज ३ गते प्रदर्शनमा आएको चलचित्र ‘कबड्डी ३’ पहिलो हप्ता ७ करोड ३८ लाखको ग्रस कलेक्सन गरेको छ । आज शुक्रबारदेखि दोस्रो हप्तामा प्रदर्शन भइरहेको यो फिल्मले पहिलो विकेन्डमा ४ करोड ३२ लाखको कमाइ गरेको हो । वितरण कम्पनी स्टेशन फाइभका अनुसार चलचित्रले ओपनिङको दिन मात्र १ करोड ४७ लाख रुपैयाँ ग्रस कलेक्सन गरेको थियो ।

दयाहाङ राई, उपासना सिंह ठकुरी, विल्सन विक्रम राई, माओत्से गुरुङ, बुद्धि तामाङ, कर्मा, विजय बराल, पुष्कर गुरुङ, कविता आले लगायतका कलाकारले अभिनय गरेको यो फिल्म कमेडी जनरामा निर्माण भएको हो । यो फिल्मलाई रामबाबु गुरुङले निर्देशन गरेका हुन् । नेपाली फिल्मले दर्शक नपाइरहेका बेला ‘कबड्डी ३’ ले आशालाग्दो व्यापार गर्न सफल भएको हो ।