काठमाडौं। सिंगापुरमा जारी त्रिकोणीय टि ट्वान्टी सिरिजको दोस्रो खेलमा शनिबार सिंगापुरविरुद्ध नेपालले १५२ रनको लक्ष्य पाएको छ। चुनौतीपूर्ण लक्ष्य पाएको नेपालका लागि कप्तान पारस खड्काले विष्फोटक ब्याटिंग गरेका छन्। उनले अर्धसतक बनाइसकेका छन्। यो समाचार तयार पार्दासम्म पारसले ३२ बलमा ६६ रन बनाइसकेका छन् । उनले सो क्रममा ६ छक्का प्रहार गरेका छन्।

नेपालले ९ ओभरमा ९३ रन बनाइसकेको छ ।

नेपालले ९ रनको स्कोरमा दोस्रो ओभरमै विकेट गुमाएको छ। इशान पाण्डे ५ रन बनाएर जनक प्रकाशको बलमा एलबीडब्ल्यू आउट भए। उनले एक चौकाको मद्दतमा ५ रन बनाए।

नेपालका पारस खड्का र आरिफ शेख मैदानमा छन्।

टस जितेर पहिला ब्याटिंग गरेको सिंगापुरले ३ विकेटमा १५१ रन बनायो। उसका लागि कप्तान टिम डेबिडले सर्वाधिक ६४ रन बनाए। यस्तै सुरेन्द्रन चन्द्रमोहनले ३५ रन बनाए । अलराउण्डर जनक प्रकाशले २५ रन बनाए।

२२ रनको स्कोरमा पहिलो विकेट गुमाएको सिंगापुरले दोस्रो विकेट ५७ रनमा गुमाएको थियो। तेस्रो विकेट उसले १०२ रनको स्कोरमा गुमाएको थियो।
नेपालका लागि सबैभन्दा सफल बलर करण केसी रहे। उनले ४ ओभरमा ३४ रन दिएर २ विकेट लिए। राष्ट्रिय टिमबाट डेब्यू गरेका सुशान भारीले ४ ओभरमा २७ रन दिएर १ विकेट लिए।

सन्दीप लामिछाने र अभिनाश बोहोराले विकेट नलिए पनि निकै कसिलो बलिंग गरे। लामिछानेले ४ ओभरमा १८ रनमात्र दिए भने बोहोराले ३ ओभरमा १६ रन दिए।

शनिबार सोमपाल कामी भने निकै महंगो सावित भए। उनले ४ ओभरमा ४१ रन दिए। पहिलो खेलमा नेपाल जिम्बाबेसँग ५ विकेटले पराजित भएको थियो।