सिरहा । साझा पार्टीका संयोजक रवीन्द्र मिश्रले जनताको मुल एजेण्डा सार्वजनिक रुपमा उठाउन सक्ने हिसावले साझा पार्टी मुलुकको पहिलो राजनीतिक शक्ति भएको बताएका छन्।

साझा पार्टी सिरहाको संयोजक घोषणा तथा नागरिक सम्बोधन कार्यक्रमलाई शनिबार सिराहको गोलबजारमा सम्बोधन गर्दै संयोजक मिश्रले प्राविधिक रुपमा पाँचौ स्थानमा भएपनि राजनीतिक रुपमा पहिलो पार्टी भएको दावी गरेका हुन ।

विना संगठन पार्टी निर्माणकै अवस्थामा पुराना पार्टीलाई पछि पार्दै पार्टी पाँचौ स्थानमा आउनु जनताको ठूलो साथ रहेको मिश्रको भनाई छ ।
मधेश, काठमाडौं र प्रदेश सरकार दुवैबाट पीडित भएको भन्दै शिक्षामा सवैभन्दा ठूलो लगानी नगरेसम्म मधेशको विकास सम्भव नहुने उनको भनाई छ।

फरक प्रसंगमा संयोजक मिश्रले संविधानलाई नाघेर हिंसात्मक गतिविधिमा लागेको विप्लव माओवादीलाई सरकारले प्रतिवन्ध लगाउनु स्वभाविक भएको बताए । हिसांत्मक गतिविधि र बम विष्फोट गराउनु शान्ति विरोधी गतिविधि भएको उनले बताए ।

भेलाले सिरहा जिल्ला संयोजकमा स्थानीय पार्टी अगुवा धनपति महतोलाई चयन गरेको छ । समारोहमा पार्टीका केन्द्रीय सदस्य मुमाराम खनाल, प्रकाशचन्द्र परियार, अब्दुश मियाँ लगायतको सहभागिता थियो । प्रदेश नं २ मा सिरहा पार्टीको पहिलो औपचारिक जिल्ला संगठन हो ।