काठमाडौं । सिंगापुरविरुद्वको त्रिकोणात्मक टी–ट्वान्टी सिरिजमा नेपालका कप्तान पारस खड्काले विश्व कीर्तिमान कायम गरेका छन् ।

सिरिज अन्तर्गत सिंगापुरविरुद्वको खेलमा कप्तान पारसले शतक प्रहार गर्दै विश्व कीर्तिमान कायम गरेका हुन् । पारसले टी–ट्वान्टी अन्तराष्ट्रियमा लक्ष्य पछ्याउने क्रममा शतक प्रहार गर्ने पहिलो कप्तानको कीर्तिमान बनाएका हुन् ।

कप्तान पारस नेपालका लागि टी–ट्वान्टी अन्तराष्ट्रियमा शतक बनाउने पहिलो खेलाडी समेत बने । उनले ५२ बलमा १ सय ६ रनको शतकिय ईनिङ्स खेलेका थिए । उनले ९ छक्का र ७ चौकाको मदतले सो रन बनाएका थिए । पारस नेपालका लागि एक इनिङ्समा सर्वाधिक रन र सर्वाधिक छक्का प्रहार गर्ने खेलाडी समेत बने ।

पारसकै कीर्तिमानी शतकमा नेपालले सिंगापुरलाई ९ विकेटले पराजित गर्यो । टी-ट्वान्टी अन्तर्राष्ट्रियमा नेपालको यो सर्वाधिक विकेटको जित समेत हो । खेलमा कप्तान पारस र आरिफ शेखले १४५ रनको साझेदारी गरे । कप्तान पारस र आरिफको साझेदारी नेपालका लागि टी–ट्वान्टी अन्तराष्ट्रियमा सर्वाधिक ठुलो रनको साझेदारी हो ।