एजेन्सी । इटालियन सिरी ए फुटबलमा इन्टर मिलान बराबरीमा रोकिएको छ । शनिबार राति भएको खेलमा इन्टर पर्मासँग २–२ गोलको बराबरीमा रोकिएको हो ।

घरेलु मैदानमा एन्टोनियो कान्ड्रेभाको गोलबाट खेलको २३ औं मिनेटमा इन्टरले सुरुवाती अग्रता बनाएको थियो । २६ औं मिनेटमा यान कारामोले गोल गर्दै पर्मालाई १–१ गोलको बराबरीमा फर्काए ।

त्यसपछि खेलको ३० औं मिनेटमा गेर्भिन्होले गोल गर्दै पहिलो हाफमा पर्मालाई २–१ को अग्रता दिलाए । दोस्रो हाफमा इन्टरका लागि लुकाकु नायक बने । खेलको ५१ औं मिनेटमा लुकाकुले गोल गर्दै इन्टरलाई हारबाट जोगाए ।

यो बराबरीसँगै इन्टरले लिगको शीर्ष स्थानमा उक्लने मौका गुमाएको छ । दोस्रो स्थानको इन्टरले ९ खेलमा २२ अंक जोडेको छ । शीर्ष स्थानको युभेन्ट्सको २३ अंक रहेको छ। १३ अंक जोडेको पर्मा लिगको छैटौं स्थानमा छ ।