काठमाडौं । चीनमा जारी बी एण्ड आर कप टी–ट्वान्टी क्रिकेट प्रतियोगिताको अन्तिम खेलमा नेपाली यू–१९ राष्ट्रिय महिला टोली पराजित भएको छ ।

सांघाईमा शुक्रबार भएको खेलमा नेपाल मलेसियासँग ५ विकेटले पराजित भएको हो । नेपालले दिएको १ सय १५ रनको लक्ष्य मलेसियाले २० ओभरमा ५ विकेट गुमाएर पुरा गर्यो ।

मलेसियाकी मास एल्सा यास्मिनले अविजित रहदै ५८ रनको अर्धशतकीय इनिङ्स खेलिन् । नेपालकी लक्ष्मी साउद, कृतिका मरासिनी, कविता कुँवर र ईश्वरी बिष्टले १–१ विकेट लिईन् ।

यस अघि पहिले ब्याटिङ गरेको नेपालले २० ओभरमा ४ विकेट गुमाएर १ सय १४ रन बनाएको थियो ।

नेपालकी राजमती ऐरीले ३७ रन जोड्दा कविता कुँवर र लक्ष्मी साउदले समान १९-१९ रन जोडिन । डली भट्टले १६ रन बनाईन् । मलेसियाकी नुर अब्दुल समादले २ विकेट लिईन् ।

यो सँगै प्रतियोगितामा नेपालले चार खेलमा दुई जित र दुई हारको आत्मसात गरेको छ । यस अघि प्रतियोगिताको पहिलो खेलमा नेपालले थाइल्याण्डसँग २९ रनको हार व्यहोरेको थियो ।

तर, दोस्रो खेलमा नेपालले चीनलाई ८ विकेटले हराएको थियो । यस्तै बिहिबार नेपालले म्यानमारलाई ३५ रनले हराएको थियो ।