काठमाडौं । बंगलादेशमा जारी एसीसी इमर्जिङ एसिया कप क्रिकेटमा प्रतिस्पर्धा गरेको नेपाली राष्ट्रिय क्रिकेट टिम आज स्वदेश फर्कदै छन् ।

प्रतियोगिताको समूह चरणबाट बाहिरिएको नेपाली टिम मंगलबार बिहान नेपाल आईपुग्ने कार्यक्रम रहेको छ । नेपाली टिम बिहान ११ः४५ मा नेपाल आउने भएका छन्।

प्रतियोगिताको समूह बी मा रहेको नेपालले समूह चरणमा एक खेल मात्र जितेको थियो । ३ खेलमा २ अंक जोडेको नेपाल समूह चरणमा तेस्रो स्थानमा रहेको थियो ।

नेपालले समूह चरणमा हङकङलाई ४० रनले हराएको थियो । तर, बंगलादेशको यू–२३ टिमसँग ८ र भारतको यू–२३ टिमसँग ७ विकेटले पराजित भएको थियो ।

नेपालको समूहबाट बंगलादेश विजेता र भारत उपविजेता बन्दै सेमिफाइनलमा पुगेको छ । अब नेपाली टिमले घरेलु भूमिमा आयोजना हुने १३ औं दक्षिण एसियाली खेलकुद साग खेल्ने छ ।