काठमाडौं । कोलकतामा भारत र बंगलादेशबीच हुन लागेको पहिलो ‘डे नाइट’ टेस्ट क्रिकेटका सबै टिकट बिक्रि भएको छ । टेस्ट च्याम्पियनसिप अन्तर्गत भारत र बंगलादेशबीचको दोस्रो तथा अन्तिम टेस्ट कोलकताको इडन गार्डेन स्टेडियममा शुक्रबारदेखि शुरुहुँदै छ ।

पहिलो पटक भारतमा डे नाइट टेस्ट क्रिकेट हुन लागेकाले दर्शकहरु पनि निकै उत्साहित रहेको भारतीय क्रिकेट बोर्ड (बीसीसीआई)का अध्यक्ष सौरभ गांगुलीले बताएका छन् । अहिलेसम्म उक्त टेस्टको चार दिनका टिकट सबै बिक्रि भएका हुन् ।

भारतीय समाचार संस्था आजतकका अनुसार डे नाइट टेस्ट भएकाले पनि सबै टिकट विक्रि भएको हो । पाँच दिनको टेस्ट क्रिकेट हुने भए पनि भारत र बंगलादेशबीचको टेस्ट कति दिनमा सकिने त्यो भने अनुमान गर्न अप्ठेरो परेको छ ।

पहिलो टेस्ट भारतले तीन दिनमै एक पारि र १३० रनले जीत निकालेको थियो । भारत र बंगलादेशबीचको दोस्रो तथा अन्तिम टेस्ट शुक्रबार दिउँसो सवा १ बजेदेखि शुरुहुने छ । रातिमा पनि खेल हुने भएकाले यो टेस्टमा पहिलो पटक पिंक रंगको बल पनि प्रयोग गरिने यस अघि नै जनाइएको छ ।