काठमाडौं। विश्व क्रिकेटमा दबदबा भएर पनि अहिलेसम्म दिन–रातको टेस्ट नखेलेको भारत आज आफ्नो इतिहासकै पहिलो डे–नाइट टेस्ट खेल्दैछ । आज सुरु हुने बंगलादेशविरुद्धको डे नाइट टेस्ट २६ नोभेम्बरम्म चल्नेछ । कोलकाताको इडन गार्डेन्समा खेल आज दिउँसो नेपाली समयअनुसार सवा १ बजे सुरु हुनेछ ।

भारतीय क्रिकेट बोर्ड (बीसीसीआइ)का अध्यक्ष सौरभ गांगुली यो टेस्टका लागि निकै उत्साहित छन् । यो खेलमा सबथोक अनुकूल रहोस् भनेर यसको पूरै जिम्मेवारी गांगुली आफैंले लिएका छन् । यो ऐतिहासिक खेलको सुरुवात प्याराट्रुपर्स इडन गार्डेनमा अवतरण गरेसँगै हुनेछ । प्याराट्रुपर्सले उड्दै आएर दुवै कप्तानलाई गुलाबी बल दिनेछन् । त्यसपछि बंगलादेशकी प्रधानमन्त्री शेख हसिना र पश्चिम बंगालकी मुख्य मन्त्री ममता बनर्जीले घण्टी बजाएर खेल सुरुवात गर्नेछन् ।

आज स्थानीइ समयअनुसार सवा १२ बजे बंगलादेशकी प्रधानमन्त्री शेख हसिना र पश्चिम बंगालकी मुख्यमन्त्री ममता बनर्जी इडन गार्डेन आउनेछन् । बीसीसीआइ अध्यक्ष सौरभ गांगुली र बंगलादेश क्रिकेट बोर्डका अध्यक्ष नजमुल हसनले उनीहरुको स्वागत गर्नेछन् । त्यसपछि दुवै देशका कप्तानले आफ्ना अ‍ेलाडीहरुलाई उनीहरुसँग परिचय गराउनेछन् । साढे १२ बजे टस हुनेछ । १२ बजेर ५४ मिनेटमा दुवै देशका खेलाडीले आ–आफ्नो राष्ट्रगान गाउनेछन् । दिउँसो १ बजे खेल सुरु हुनेछ ।