एजेन्सी। बलिउड अभिनेत्री तापसी पन्नुले आफ्नो खास पहिचान बनाइसकेकी छिन् । कैयौं फिल्ममा उनको कामको लागि उनको प्रशंशा भएको छ । साथमा तापसी ट्रालरलाई दिएको जवाफका कारण पनि चर्चामा रहन्छिन् । फिल्ममा भने आफ्नो भूमिकाका लागि उनी लगातार परीक्षण गरिरहन्छिन् । कैयौं फिल्ममा उनले एकदमै फरक भूमिका गरेकी छिन् ।

अब भने उनले सुपरवुमनको भूमिका निभाउने इच्छा जाहिर गरेकी छिन् । हालै गोवामा भएको अन्तर्राष्ट्रिय फिल्ममा उनलाई ऋतिक रोशनको सुपरहिरो फिल्म क्रिश ४ मा सुपरवुमनको भूमिका निभाउनेबारे प्रश्न सोधिएको थियो । यसको जवाफमा तापसीले आफू यतो भूमिका गर्न इच्छुक भएको बताइन् ।

क्रिशमा तापसीले काम गर्न इच्छुक भएको बताएपछि कैयौंले यसलाई कंगना रनौतसँग जोडेर हेरेका छन् । पछिल्लो समय कंगना र तापसीको बीचमा मनमुटावको खबर आइरहन्छन् । कंगनाले क्रिशको अघिल्लो भागमा सुपरवुमनको भूमिका निभाएकी थिइन् । यही कारण तापसीको पछिल्लो भनाइलाई कंगनासँग जोडिएको हो ।