नयाँ दिल्ली। भारतको सर्वोच्च अदालतले फाँसीको सजाय सुनाइसकेका निर्भया काण्डका दोषीले सर्वोच्च अदालतमै पुनर्विचारको लागि दिएको निवेदन अदालतले स्वीकार गरेको छ । निर्भया बलात्कार र हत्याकाण्डका चारै जना दोषीलाई सर्वोच्चले यसअघि नै फाँसीको सजाय सुनाइसकेको छ । जिल्ला अदालतले फाँसीको सजाय सुनाएका यी दोषीको सजाय उच्च अदालत हुँदै सर्वोच्च अदालतले पनि कायमै राखेको थियो । यी ४ जना दोषीमध्ये एकले दिएको पुनर्विचार याचिका सर्वोच्चले स्वीकार गरेको हो ।

दोषी अक्षय कुमारले दिएको पुनर्विचार याचिकामा अब सर्वोच्च अदालतले यही डिसेम्बर १७ मा दिउँसो २ बजे सुनुवाइ गर्नेछ । तीन न्यायाधीशको बेन्चमा यसको सुनुवाइ हुनेछ । सर्वोच्च अदालतले दोषीको याचिका स्वीकार गरेपछि निर्भयाकी आमाले आक्रोश व्यक्त गरेकी छिन् । निर्भयाकी आमाले यो कानुनी व्यवस्थामाथि थप्पड भएको बताएकी छिन् । उनले सर्वोच्च अदालतको निर्णय सुन्दा आफूलाई झट्का लागेको बताउँदै व्यवस्था अपराधीको अगाडि लाचार भएको बताइन् । उनले १६ डिसेम्बरमा उनीहरुलाई फाँसी दिइन्छ भन्ने आफूले आशा गरेको बताएकी छिन् । ७ वर्षअघि १६ डिसेम्बरकै दिन निर्भयाको हत्या भएको थियो ।

पूरै देश निर्भयाका दोषीहरुलाई सजाय दिइने प्रतिक्षामा छ तर अर्कोतर्फ यसका दोषीहरु कानुनी अप्ठ्याराको फाइदा उठाउने कोसिस गरिरहेका छन् । सर्वोच्च अदालतले फाँसीको सजाय कायमै राखेपछि अहिले दोषीहरुको दया याचिका राष्ट्रपतिकहाँ पुगेको छ । राष्ट्रपतिले दया याचिका खारेज गर्नेबित्तिकै उनीहरुलाई फाँसीको सजाय निश्चित हुनेछ । तर, यही बीचमा एक दोषीले सर्वोच्चमै पुनर्विचार याचिका दायर गरे । अदालतले यसलाई पनि स्वीकार गरेको छ । दोषी अक्षय कुमार ठाकुरले आफूलाई दिइएको फाँसीको सजायमा एकपटक फेरि विचार गर्न आग्रह गरेका छन् ।

सर्वोच्चले यो याचिका स्वीकार गरेर सुनुवाइ गर्ने निर्णय गरेसँगै उनीहरुको सुनुवाइ लम्बिनेछ । यससँगै सुनुवाइ सकिने प्रतिक्षामा राष्ट्रपतिले दया याचिकामा गर्ने निण्र्णयमा पनि ढिलाइ हुनेछ । राष्ट्रपतिकहाँ दया याचिका पुगिसकेको अवस्थामा यसमा निर्णय गर्न ढिलाइ हुँदा यसले दोषीहरुको मानवअधिकारको हनन हुने संविधानको धारा आकर्षित हुने सम्भावना हुन्छ । यदि यो धारा आकर्षित भएमा यसको सुनुवाइ फेरि सर्वोच्चमै फर्किनेछ र अदालतले उनीहरुको सजाय कम गर्न सक्छ । यसअघि निर्णयमा ढिलाइ भएर मानवअधिकारको धारा आकर्षित हुँदा पूर्व प्रधानमन्त्री राजीव गान्धीका हत्याराले पाएको फाँसीको सजाय २०१४ मा सर्वोच्च अदालतले बदलेर आजीवन कारावासको सजाय सुनाएको थियो ।

उता तिहाड जेलमा भने दोषीहरुलाई फाँसी दिने तयारी चलिरहेको छ । ३ जना दोषी पहिलेदेखि नै तिहाड जेलमा थिए तर एक दोषी विनय शर्मा अर्को जेलमा थिए जहाँ फाँसीको व्यवथा थिएन । अहिले विनयलाई पनि फाँसीको व्यवस्था भएको तिहाड जेलमै ल्याइएको छ । विनयलाई मण्डोली जेलबाट तिहाड सारिएसँगै उनीहरुलाई फाँसी दिइने विषय चर्चामा छ । विनयलाई फाँसी दिनकै लागि तिहाड ल्याइएको आम नागरिकको बुझाइ छ ।