बानेश्वर । सिन्धुपाल्चोकको सुनकोशी–७ मा यात्रुवहाक बस दुर्घटना ज्यान गुमाउनेको संख्या १४ पुगेको छ ।

सिन्धुपाल्चोकको सुनकोशी गाउँपालिका–७ स्थित छ किलो भन्ने स्थानमा बा ४ ख ४४६८ नम्बरको यात्रुवहाक बस दुर्घटना हुँदा १२ जनाको घटनास्थलमै र २ जना गम्भीर घाईतेको उपचारका क्रममा ज्यान गएको जिल्ला प्रहरी कार्यालय सिन्धुपाल्चोकले जनाएको छ। दुर्घटनामा परी ज्यान गुमाउने र घाईतेको पहिचान खुल्न भने बाँकी छ ।

कालिञ्चोक दर्शन गराएर ४० जना यात्रुसहित भक्तपुर तर्फ फर्किँदै गरेको बस सडकबाट करिब एक सय मिटर तल खसेर क्षत विच्छेद भएको छ।

अहिले गम्भीर घाईते २ जनालाई काठमाडौँ ल्याईएको तथा अन्यको खाँडीचौरमा उपचार भईरहेको प्रहरीले जनाएको छ।

यसअघि गत कार्तिकमा मात्रै सिन्धुपाल्चोकको सुकुटेमा बस दुर्घटनाहुँदा १७ जना यात्रुको ज्यान गएको थियो ।