काठमाडौं । अस्ट्रेलियाको घरेलु क्रिकेट प्रतियोगिता बिग ब्यास लिग मंगलबारदेखि सुरु भएको छ। मंगलबार भएको बिग उद्घाटन खेलमा सिड्नी थन्डरले विजयी सुरुवात गरेको छ । सिड्नीले ब्रिसबेन हीटलाई २९ रनले हराउँदै जित निकालेको हो।

सिड्नीले दिएको १ सय ७३ रनको लक्ष्य पछ्याएको ब्रिसबेनले १९.२ ओभरमा सबै विकेट गुमाएर १ सय ४३ रन मात्र बनाउन सक्यो । उसका लागि बेन कटिङले २८, म्याट रेन्शाले २६, टम ब्यान्टनले १६, र्माक स्केटीले १५, साम हिजलेटले १२, म्याक्स ब्रायन्टले ११ र कप्तान क्रिस लिनले ९ रन बनाए । बलिङमा सिड्नीका क्रीस ग्रीन, अर्जुन नायर, डेनियल सम्स, जोनाथन कुकले २–२ र क्रिस ट्रेमेनले एक विकेट लिए ।

यसअघि टस जितेर ब्याटिङ रोजेको सिड्नीले निर्धारित २० ओभरमा ६ विकेट गुमाएर १ सय ७२ रन बनाएको थियो । उसका लागि कप्तान क्यालम फर्ग्युसनले सर्बाधिक ७३ रन बनाए । उनले ४४ बलमा ३ छक्का र ६ चौका प्रहार गर्दै ७३ रन बनाए। बलिङमा ब्रिसबेनका मिचेल स्वीपसनले सर्वाधिक २ विकेट हात पारे ।

बीबीएलमा नेपाली क्रिकेट टिमका महत्वपूर्ण सदस्य सन्दीप लामिछाने पनि खेलिरहेका छन् । उनी यो सिजन पनि मेलबर्न स्टार्सबाट खेलिहरेका छन् । सन्दीपको टिमको पहिलो खेल शुक्रबार ब्रिसबेन हीटविरुद्ध छ।