काठमाडौँ । फ्रेन्च क्लब पिएसजीले अमिएन एससी क्लबमाथि शानदार जित हासिल गरेको छ । गएराती सम्पन्न खेलमा पिएसजीले अमिएन एससीलाई ४–१ गोल अन्तरले पराजित गरेको हो । पिएसजीको जितमा किलियन एम्बाप्पेले २ गोल गरे भने नेइमार र माउरो इकार्डीले एक एक गोल गरेका थिए । त्यस्तै अमिएनका लागि एक गोल मेनडोजाले फर्काएका थिए ।

यस खेलमा दुई गोल गरेका एम्बाप्पेले २०१९ मा आफ्नो लिग वानको गोल संख्या ३१ पुर्याएका छन् । लिग वानमा पिएसजीकै एडिसन कभानीले २०१७ मा ३६ गोल गरेका थिए । साथै नेइमारले समेत उत्कृष्ट प्रदर्शन जारी राख्दै एक गोल र एक असिस्ट गरेका थिए । उनले पछिल्ला तीन खेलमा हरेक खेलमा गोल र असिस्ट गर्दै आफ्नो उत्कृष्ट फर्म कायम राखेका छन् ।

यो जितपछि पिएसजीले आफ्नो अग्रता बढाएको छ । पिएसजीले १८ खेलमा ४५ अंकसहित शीर्ष स्थानमा रहेको छ भने दोस्रो स्थानमा रहेको मार्सेलीभन्दा ७ अंकले अगाडी रहेको छ । त्यस्तै अमिएन भने १८ खेलमा १७ अंकसहित रेलिगेसन जोनमा रहेको छ ।