काठमाडौं। राजधानीको बौद्धमा केही दिनअघि एक युवकको लिंग काटिएको विषयमा युवती पक्षले आफूहरु पीडित भएको तर प्रहरीले पीडिकलाई पीडित भनेर आफूहरुमाथि अन्याय गरेको दावी गरेका छन् । बौद्धमा प्रेम छुटेपछि एक युवतीले पूर्वप्रेमीको लिंग काटेको भन्दै युवतीलाई प्रहरीले पक्राउ गरेको थियो ।

आज पत्रकार सम्मेलन गर्दै युवती पक्षले प्रहरीले घटनाको वास्तविकता नै नबुझी मुद्दा अगाडि बढाएको आरोप लगाएका हुन् । उनहिरुको दावी अनुसार त्यस दिन युवतीको कोठामा पुगेका युवकले बलात्कारको प्रयास गरेपछि युवतीले आत्मरक्षा गर्ने क्रममा युवकको लिंगमा चोट लागेको हो ।

पत्रकार सम्मेलनमा बताइएअनुसार ती दुईको पहिले प्रेम सम्बन्ध थियो । तर, पछि युवकले प्रेम सम्बन्ध अगाडि बढ्न नसक्ने बताएका थिए । त्यसपछि भेटेका बेला युवकले यौन सम्बन्धको प्रस्ताव गरेका थिए । युवतीले सम्बन्ध अगाडि नबढ्ने अवस्थामा युवकले आफ्नो यौन शोषण मात्र गर्न चाहेको भन्दै प्रस्ताव अस्वीकार गरेकी थिइन् । त्यसपछि उनले जबरजस्ती गर्न खोजेपछि युवतीले प्रतिकार गर्दा चोट लागेको हो ।

युवती पक्षका अनुसार उनीहरुले बलात्कार प्रयास अभियोगमा उजुरी दर्ता गर्न चाहेका थिए तर प्रहरीले उजुरी लिन नमानेको उनीहरुले आरोप लगाएका छन् । युवक पक्षले प्रहरीलाई उजुरी नलिन दबाब दिएका कारण प्रहरीले उजुरी नलिएको उनीहरुको आरोप छ । उनहिरुले प्रहरीले पीडितलाई पीडक र पीडकलाई पीडत बनाएर युवतीमाथि ज्यान मार्ने उद्योग मुद्दा चलाएको उनीहरुको आरोप छ ।