काठमाडौं। नेपाली महिला क्रिकेटर अञ्जली चन्दले डेब्यू खेलमै अन्तर्राष्ट्रिय क्रिकेटमा विश्वरेकर्ड बनाएपछि उनको अन्तर्राष्ट्रिय मिडियामा चर्चा चुलिएको छ । विश्वभरका ठूला अन्तर्राष्ट्रिय मिडियाहरुले उनको प्रशंशा गर्दै समाचार लेखेका छन् । क्रिकेटको सबैभन्दा ठूलो मिडिया मानिने क्रिकइन्फोदेखि बेलायतको प्रतिष्ठित मिडिया बीबीसीसम्मले उनको प्रशंशाका समाचार लेखेका छन् । उनले विश्व क्रिकेटका दिग्गज खेलाडीहरु सबैलाई उछिन्दै अन्तर्राष्ट्रिय टि–२० मा बेस्ट बलिङ फिगरको विश्वरेकर्ड बनाएकी हुन् ।

हिजो भएको माल्दिभ्सविरुद्धको खेलमा अञ्जलीले २ ओभर १ बल बलिङ गर्दै एक रन पनि नदिइ ६ विकेट लिएर अन्तर्राष्ट्रिय टि–२० मा नयाँ इतिहास बनाएकी थिइन् । पोखरामा भएको खेलमा अञ्जलीले आफ्ना सुरुका २ ओभरमध्ये पहिलो ओभर ३ विकेटसहित मेडन र दोस्रो ओभर २ विकेटसहित मेडन राखिन् र तेस्रो ओभरको पहिलो बलमै विकेट लिँदै इतिहास बनाएकी हुन् । उनले दोस्रो ओभरको अन्तिम दुई बलमा २ विकेट र तेस्रो ओभरको पहिलो बलमै विकट लिँदै आफ्नो ह्याट्रिकसमेत पूरा गरेकी थिइन् । उनको यो इनिङको इकोनोमी शुन्य छ । यसअघि यो रेकर्ड मलेसियाकी मास एलियाको नाममा थियो । एलिसाले गएको जनवरीमा चीनविरुद्ध भएको खेलमा ४ ओभरमा १ ओभर मेडन राख्दै ३ रन दिएर ६ विकेट लिएकी थिइन् ।