एजेन्सी । इन्ग्लिश प्रिमियर लिग फुटबलमा आज राति लिग लिडर लिभरपुलले सेफिल्ड युनाइटेडसँग प्रतिस्पर्धा गर्दैछ । लिभरपुलले नवप्रवेशी क्लब सेफिल्डसँग घरेलु मैदानमा खेल्नेछ । खेल नेपाली समय अनुसार राति १ः४५ बजे सुरु हुनेछ ।

घरेलु मैदानमा सेफिल्डविरुद्ध लिभरपुल सहज जितको खोजीमा हुनेछ । तुलनात्मक कमजोर टिम सेफिल्डलाई पराजित गर्दै लिभरपुल शीर्ष स्थानको अग्रता थप फराकिलो बनाउन चाहन्छ ।

सेफिल्डलाई घरेलु मैदानमा हराउन सके लिभरपुलले शीर्ष स्थानको अग्रता १३ अंकको बनाउने छ । लिभरपुलले १९ खेलमा ५५ अंक जोडेको छ । दोस्रो स्थानको लेष्टर सिटीको ४५ अंक रहेको छ ।

यता सेफिल्डलाई घरेलु टोलीलाई स्तब्ध बनाउने योजनामा हुनेछ । लिगको आठौं स्थानमा रहेको सेफिल्ड जित निकाल्दै अंक तालिका सुधार गर्न चाहन्छ । लिगमा २९ अंक जोडेको सेफिल्ड लिभरपुललाई हराउन सके लिगको शीर्ष पाँचमा उक्लने छ ।