काठमाडौं। एक्सन स्टार विराज भट्टको निर्देशकीय डेब्यू चलचित्र ‘साङ्लो’को ट्रेलर सार्वजनिक गरिएको छ।

शुकबार काठमाडौंमा एक कार्यक्रमकाबीच ३ मिनेट लामो ट्रेलर सार्वजनिक गरिएको हो। सार्वजनिक ट्रेलरमा विराजको दमदार एक्सन देखिन्छ। एक्सनप्रेमी दर्शकलाई चलचित्रको ट्रेलरले ध्यान तान्छ।

विराजको पहिलो निर्देशन र झण्डै तीन वर्षपछि अभिनयमा कमब्याक गर्न लागेका कारण माघ २४ गतेदेखि देशब्यापी प्रदर्शनमा आउने तयारीमा रहेको ‘साङ्लो’लाई चलचित्रकर्मी र दर्शकले चासोका रुपमा हेरेका छन्। विराज पनि चलचित्रका लागि आफूले निकै मेहनत गरेको बताउँछन्। उनले भनेजस्तै ट्रेलरमा त्यो मेहनत झल्किएको पनि देखिन्छ।

शिवम अधिकारीको लेखन रहेको ‘साङ्लो’ले किड्नी तस्करीको कथा वाचन गर्नेछ। चलचित्रमा विराजले मिस नेपाल–२०१७ निकिता चण्डकसँग जोडी बाँधेका छन्। निकिताले यसै चलचित्रमार्फत नेपाली रजतपटमा डेब्यू गर्दैछिन्।

साथमा प्रकाश शाह, कामेश्वर चौरासिया, जयनन्द लामा, आर.पि. पन्त, लय संगौला, अमित गिरी, शिशिर भण्डारी, रमेश सोडारी, भिष्म जोशी लगायतका कलाकारहरुको चलचित्रमा अभिनय छ।

विराज भट्ट फिल्म प्रोडक्सन प्रा.ली.को व्यानरमा निर्मित चलचित्रको निर्माता तेज बहादुर खड्का हुन्। सुरेश अधिकारी र राजनराज शिवाकोटीको संगीत रहेको चलचित्रका गीतमा कविराज गहतराज र रामजी लामिछानेको कोरियोग्राफी छ।

चलचित्रमा मानकृष्ण महर्जनको छायांकन, श्री श्रेष्ठको द्धन्द्ध तथा अर्जुन जिसीको सम्पादन छ।