काठमाडौं । दक्षिण अफ्रिकाका पूर्व कप्तान हसिम अमला नेपाल आउने भएका छन्। नेपालमा हुन लागेको एभरेष्ट प्रिमियर लिग(ईपीएल) खेल्न उनी नेपाल आउने भएका हुन्।

एभरेष्ट प्रिमियर लिगकाे नयाँ सिजनका लागि आयोजकले विदेशी खेलाडीका रूपमा नयाँ प्रावधान बनाएसँगै स्टार खेलाडी यसपटक नेपालमा खेल्न आउने संभावना बढेको हो।

अमला ईपीएलका लागि नेपालआउने पक्का भएको जोरा स्पोर्टस म्यानेजमेन्टका एमडी आमीर अख्तरले डिसी नेपाललाई बताए। तर अमला कुन टिमबाट खेल्ने भन्ने पक्का नभएको पनि उनले बताए। केही दिनमा अमला कुन टिमबाट खेल्ने भन्ने टुंगो लाग्नेछ।

यसपटकको इपीएलमा अन्तराष्ट्रिय स्तरमा चर्चा कमाएका खेलाडी ल्याउने तयारी भइरहेको छ । दक्षिण अफ्रिकी खेलाडी नै भित्र्याउने क्रममा गत बर्ष पोखरा राइनोजले रिचार्ड लेभिलाई खेलाएको थियो ।

अमलाले १८१ एकदिवसीय खेलमा ८ हजार १ सय १३ रन बनाएका छन जसमा २७ शतक र ३९ अर्धशतक प्रहार गरेका थिए । ४४ ट्वान्टी ट्वान्टी अन्तराष्ट्रिय खेलेका उनले १२ सय ७७ रन बनाएका छन ।