काठमाडौं। नेपाली बजारमा सुनको मूल्य हालसम्मकै उच्च विन्दुमा पुगेको छ।

शुक्रबार ७४ हजार ५ सय रुपैयाँमा कारोबार भएको छापावाला सुन साताको पहिलो दिन आईतबार (आज) बजार खुल्ने बित्तिकै एक हजारले वृद्धिभई तोलामा ७५ हजार ५ सय रुपैयाँ कायम भएको छ।

नेपाल सुनचाँदी व्यवसायी महासङ्घका अनुसार आईतबार तेजाबी सुन भने तोलामा ७५ हजार २ सय रुपैयाँ कायम भएको छ। शुक्रबार तेजाबी सुनको मूल्य ७४ हजार २ सय रुपैयाँ थियो। चाँदीको मूल्य भने प्रतितोला ९ सय रुपैयाँमा कारोबार भएको छ। शुक्रबार पनि चाँदीको मुल्य ९ सय रुपैयाँ नै थियो।

यही पुस १ गते छापावाला सुन प्रतितोला ७१ हजार ५ सय रुपैयाँमा कारोबार भएको थियो भने तेजाबी सुन प्रतितोला ७१ हजार २ सय रुपैयाँमा कारोबार भएको थियो। आईतबारसम्म आइपुग्दा छापावाल र तेजाबी सुन २० दिनको अन्तरालमा प्रतितोला चार हजार रुपैयाँले वृद्धि भएको छ। पुस १ गते प्रतितोला ८५० रुपैयाँमा कारोबार भएको चाँदी आईतबार २० दिनमा आइपुग्दा ५० रुपैयाँले वृद्धि भएको छ।

महासङ्का अनुसार गत मङ्सिरमा सामान्य अङ्कले ओरालो लागेको सुनचाँदीको बजारमा पछिल्ला दिनमा भने उल्लेख्य मूल्य वृद्धि भएको छ।

गत मङ्सिर १ गते छापावाल सुन प्रतितोला ७१ हजार ८ सय रुपैयाँ, तेजाबी सुन ७१ हजार ५ सय रुपैयाँ र चाँदी प्रतितोला ८ सय ५५ रुपैयाँमा कारोबार भएको थियो। सोही महिनाको २० गते छापावाला सुन प्रतितोला ७१ हजार ७ सय रुपैयाँ, तेजावी सुन ७१ हजार ४ सय रुपैयाँ र चाँदी ८ सय ५० रुपैयाँमा कारोबार भएको थियो। एक महिनाको अवधिमा भने छापावाला र तेजाबी सुन तीन हजार ८ सय रुपैयाँले वृद्धि भएको छ।

अमेरिका र इरानबीचको विवादले अन्तर्राष्ट्रिय बजारमा सुनको मूल्यमा वृद्धि हुँदा त्यसको प्रभाव नेपाली बजारसमेतमा परेको जनाइएको छ।रासस