काठमाडौं। सुन र हिरासहित आइतबार दुईजना भारतीय नागरिक पक्राउ परेका छन्। त्रिभुवन अन्तर्राष्ट्रिय विमानस्थलबाट क्याप्सुल सुनिसहित एकजना भारतीय र अर्का एकजना भारतीय नागरिक हिरासहित पक्राउ परेको अपराध महाशाखा प्रमुख एसएसपी सहकुल थापाले डिसी नेपाललाई जानकारी दिए।

उनले पछिल्लो दिनहरुमा भारतीयहरु तस्करीमा सक्रिय रहेको देखिएको बताए।

प्रहरीका अनुसार आइतबार त्रिभुवन अन्तर्राष्ट्रिय विमानस्थलबाट आधा किलोग्राम क्याप्सुल बनाइएको सुनसहित भारतीय नागरिक नौसाद पक्राउ परेका छन्। उनी यूएईको शारजहाँबाट आएका हुन्। विमानस्थलमा उनको गतिविधि शंकास्पद देखिएपछि प्रहरीले खोजीतलासी गर्दा सुन फेला परेको एसएसपी थापाले जानकारी दिए।

उनले अर्का भारतीय नागरिक मोहम्मद म्यादिनका साथबाट २ सय ग्राम हिरा फेला परेको छ। उनीहरु दुबैजनालाई थप अनुसन्धानका लागि अपराध महाशाखाको हिरासतमा राखिने जनाइएको छ।

पछिल्लो एक हप्तामा तस्करीमा ५ जना भारतीय नागरिक पक्राउ परिसकेका छन्। विमानस्थलमा अवैध सुन तस्करीमा भारतीयहरु पक्राउ पर्नुले भारतीय गिरोह सक्रिय रहेको देखिएको प्रहरीले बताएको छ।