काठमाडौं। भारतीय क्रिकेट कन्ट्रेल बोर्ड (बीसीसीआइ)ले बिहीबार २०२० का लागि अनुबन्धित खेलाडीको घोषणा गरेको छ । बीसीसीआइले जारी गरेको २७ खेलाडीको सूचीमा पूर्वकप्तान महेन्द्र सिंह धोनी परेनन् । धोनीले जुलाइ २०१९ पछि भारतको लागि कुनै पनि अन्तर्राष्ट्रिय खेल खेलेका छैनन् । यस्तोमा उनको करिअरमा एकपटक फेरि गम्भीर प्रश्न उठेको छ । समर्थकहरुले के धोनीको करिअर समाप्त भइसकेको हो ? भन्दै प्रश्न गरेका छन् ।

बीसीसीआइले जारी गरेको सूचीमा ए प्लस वर्गमा ३ खेलाडी छन् जसले वार्षिक ७ करोड पारिश्रमिक पाउँछन् । ए वर्गमा ११ जना खेलाडी छन् । यी खेलाडीले वार्षिक ५ करोड पाउँछन् । वार्षिक ३ करोड पाउने बी वर्गमा ५ जना खेलाडी छन् । सी वर्गमा ८ जना खेलाडी छन् । सी वर्गका खेलाडीले वार्षिक १ करोड पाउँछन् ।

विश्वकप २०१९ को सेमिफाइनलपछि धोनीले अन्तर्राष्ट्रिय खेल खेलेका छैनन् । पछिल्लो समय धोनीले आफू खेल्ने वा नखेल्नेबारे प्रश्न जनवरी पछि मात्र सोध्न भनेका थिए । भारतीय टिमका कोच रवि शास्त्रीले धोनी भारतीय टिममा बोझ बन्न नचाहेको तर छिटै एक ठूलो प्रतियोगितामा भारतका तर्फबाट खेल्ने बताएका थिए । धोनी अनुबन्ध सूचीमा नभए पनि उनलाई भारतको तर्फबाट खेल्न भने रोकिने छैन । बीसीसीआइको विधानमा अनुबन्धमा नभएका खेलाडी पनि प्लेइङ ११ मा हुन सक्ने व्यवस्था गरिएको छ ।

बीसीसीआइले जारी गरेको अनुबन्ध सूचीमा ए प्लस वर्गमा विराट कोहली, रोहित शर्मा र जसप्रित बुमराह छन् । यस्तै ए वर्गमा रविचन्द्रन अश्विन, रविन्द्र जडेजा, भुवनेश्वर कुमार, चेतेश्वर पुजारा, अजिंक्य रहाणे, केएल राहुल, शिखर धवन, मोहम्मद शमी, इशान्त शर्मा, कुलदीप यादव र ऋषभ पन्त छन् । यस्तै बी वर्गमा ऋद्धिमान साहा, उमेश यादव, युजवेन्द्र चहल, हार्दिक पंड्या, मयंक अग्रवाल छन् । सी वर्गमा केदार जाधव, नवदीप सैनी, दीपक चाहर, मनीष पाण्डे, हनुमा विहारी, शार्दुल ठाकुर, श्रेयस अय्यर र वाशिंगटन सुन्दर छन् ।